Xonanda Jasur Umirov “So‘g‘diyona” gazetasiga intervyu berdi. U suhbat davomida san’at xobbisi emasligi, ko‘pchilik uning san’atkor bo‘lishiga ishonmagani, “Jumagul” qo‘shig‘ining yaratilish tarixi va oddiy oila qiziga uylanmoqchi ekanini aytib o‘tdi.
“Erkaliklarim ortda qolgan”
— Xonandalikka iqtidorim borligini his qilganman. Qolaversa, buvim, tog‘am san’atga qiziqishgan, qonimizda bor. Qo‘shiqlarimni o‘zim yozaman. Chunki meni yo‘nalishimdagi qo‘shiqlarni ko‘pchilik yozib bera olmaydi. Konservatoriyada o‘qigan talaba yaxshi xonanda bo‘lolmasa ham har holda yaxshi tinglovchi bo‘la oladi. San’at men uchun xobbi emas. Bu mening kasbim. Bu sohani pul uchun tanlamaganman. O‘zim xohlagandek xonanda bo‘ldim va muxlislar ortira oldim, deb o‘ylayman.Yoshligimda erka bo‘lganman. Dadam og‘zimdan chiqqanini muhayyo qilardi. Endi yosh bola emasman. Erkaliklarim ortda qolgan. Hayotda qiyinchilik ko‘rmagan odam o‘rnini topolmaydi. Yoshlikda mehnatda katta bo‘lganman. Otam boshida 8 yil menga homiylik qilgan. Undan keyin dadamdan pul olmay qo‘yganman.
“Hech kimga yoqmading deyishgan”
— Yo‘nalish topishdan avval uch yilcha qiynalganman. Suratga olgan kliplarimiz ommalashmagan. Akam “Boshqa ish qil, qo‘shiqlaring ham, o‘zing ham hech kimga yoqmading”, degandi. Shuncha yil o‘qiganman deb o‘zimga-o‘zim tavakkal bir ashula yozaman, dedim. “Billura” qo‘shig‘i meni xalqqa tanitdi. Avvaliga o‘zimga unchalik yoqmadi. Gapirganimda ovozim yo‘g‘on chiqdi. Zafar Qodirov degan do‘stim qo‘shiqni baland ovozda aytishim kerakligini maslahat bergan. Shu uslubda kuylashim odamlar e’tiborini qozondi. Xit qo‘shilarimning aksariyat shu tarzda aytilgan.
“ ‘Sendan xonanda chiqmaydi’ deganlar ham bo‘lgan”
— O‘zbekiston davlat konservatoriyasida o‘qiyotganimda darslarga ko‘p bormasdim. Shundan ustoz san’atkor Kozim Qayumov “Sendan xonanda chiqmaydi”, degandi. Haydalmasdan o‘qishni oxirigacha yetkazganim omadim bo‘lsa kerak. Ustozimning o‘rgatganlarini tez ilib ololmaganman. O‘qishga kirgunimcha musiqiy bilimim yo‘q edi. Shundan jahli chiqqandi.
“Jumagul’ sirdaryolik qizga bag‘ishlangan”
— Bir yili Sirdaryodagi stadionda konsert bergandim. O‘sha kuni rosa yomјir yog‘gandi. Shunga qaramay, tomoshaga kelganlar tarqalmadi. Qo‘shiq aytayotib, uzoqdan qo‘riqlash xizmati bir qizni o‘tishga qo‘ymayotganiga ko‘zim tushdi. Nihoyat qiz dugonasi bilan yonimga keldi. Qo‘lidagi ayiqchani menga berdi. O‘smir yoshidagi chiroyli qiz ekan. Dastxat so‘radi. Ismini so‘radim. Dugonasi “Ismi Jumagul, o‘zi gapirolmaydi”, deb aytdi. Jumagul ismini birinchi bor eshitishim edi. Dugonangga ayt, uning ismiga, albatta, qo‘shiq kuylayman, deb aytgandim. Birinchi yozgan qo‘shiјim xit bo‘ldi. Shu-shu o‘zim qo‘shiq yozishni boshladim. Avvallari menga qo‘shiq yozib berishardi. Lekin o‘z g‘oyalarimni qo‘shib turardim. 30 ta qo‘shig‘imni o‘zim yozganman.
“Nechta mashina oynasini sindirganimni eslolmayman”
— San’atkor bo‘lishning o‘zi bir tarbiya. Bizning soha har kimni charxlab qo‘ya oladi. Ko‘p odamlar bilan muloqotda bo‘lasiz, ko‘p narsani o‘rganasiz. San’atkor bo‘lmaganimda, balki janjalkash ko‘cha bolasi bo‘larmidim. San’atkor bo‘lganim uchun kim bilandir janjallashishga uyalib turaman ko‘pincha. Lekin meni shunday deb o‘ylashadi. Yildan-yilga sho‘xliklarim kamayyapti.
Ammo o‘zim bilmagan holda birovlarga ozor berib qo‘yaman. Nechta mashina oynasini sindirganimni sanog‘ini bilmayman. Jahlim chiqqanida telefon yo televizorni sindirishim bor gap. Shunday qilsam, jahlimdan tez tushaman.
“Sudlashyapti deyishsa, qizlar tillasini sotib pul bergan”
— Instagram’da sahifa ochib berish iltimosi bilan bir odamga murojaat qilgandim. Bilsam, u xaker ekan. O‘zim bu ishlarga uncha aralashmasdim. Go‘yoki men qaysidir san’atkor bilan janjallashib sudlashib yurganman-u va menga katta pul kerak bo‘lgan. Sodda qizlar ishonib bisotidagi tillasini sotib, olib kelib berishgan. 4 ta qizdan kamida 20 ming dollar olgan.
“Sevgisiz oddiy oilaning qiziga uylanaman”
— Qiz qidirishga bo‘lgan harakatni to‘xtatdim. Boshim toshga tegib, shu fikrga keldim. Endi sevgimni izlamayman, u sevgi meni qidirsin. Sevgisiz ham oila qurish mumkin-ku. To‘g‘risini aytsam, men bilgan sevishgan juftliklarning ko‘pi hayotda baxtli emas. Oddiy oilaning qiziga uylanishni xohlardim. Kamgap bo‘lsa, undan ham yaxshi.
Mavzuga doir:
- Dilshod Rahmonov san’atga qaytishiga nima turtki bo‘lgani, biznesi va nohaq “zapret”ga tushgani haqida (video)
- Feruza Sobitova turmushi buzilishiga aktrisaligi sabab bo’lgani hamda san’atni tark etayotgani haqida (video)
- “Baxtli kunlarni yashayapmiz”. Shohruxxon Asal Shodiyevaning ijod qilishiga munosabati hamda filmlardagi gonorari 5 ming dollarga baholangani haqida (video)
- Mavluda Asalxo‘jayeva otasini aldab teatr institutiga o‘qishga kirgani, maktabda o‘qituvchi bo‘lib ishlagani va Turkmanistonning mashhur rok guruhida qo‘shiq kuylagani haqida (video)