Namangan viloyati Yangiqo‘rg‘on tumanida arxeologiya obyektiga 80 milliard so‘m zarar yetkazilgani aniqlandi. Bu haqda Madaniy meros agentligi xabar berdi.
Ta’kidlanishicha, Bosh prokuratura, Davlat xavfsizlik xizmati va Madaniy meros agentligi mutaxassislari ishtirokida o‘tkazilgan o‘rganishlar natijasida Yangiqo‘rg‘on tumani mas’ul shaxslari tomonidan madaniy meros obyekti uy-joy qurilishi uchun noqonuniy berib yuborilgani aniqlandi. Oqibatda obyektga jiddiy zarar yetkazilgan.
Jumladan, madaniy meros yodgorligi hisoblangan Yangiqo‘rg‘on tumani “Gaiston” mahallasida joylashgan “Gaistontepa” arxeologiya yodgorligiga oid hujjatlar tuman kadastr va qurilish bo‘limi boshliqlari tomonidan qonunchilik talablariga zid ravishda yer uchastkalarini berish masalasini ko‘rib chiquvchi komissiyaga taqdim etilgan va ushbu hudud noqonuniy ravishda fuqarolarga dala hovli qurish uchun ajratilgan.
Oqibatda arxeologiya yodgorligi 2020—2021-yillar davomida fuqaro Z.M. tomonidan buzib tashlanib, o‘rniga uy-joy qurilgan. Tekshirish natijasiga ko‘ra jinoyat ishi qo‘zg‘atilib, tergov harakatlari olib borilmoqda.
Izoh (0)