Наманган вилояти Янгиқўрғон туманида археология объектига 80 миллиард сўм зарар етказилгани аниқланди. Бу ҳақда Маданий мерос агентлиги хабар берди.
Таъкидланишича, Бош прокуратура, Давлат хавфсизлик хизмати ва Маданий мерос агентлиги мутахассислари иштирокида ўтказилган ўрганишлар натижасида Янгиқўрғон тумани масъул шахслари томонидан маданий мерос объекти уй-жой қурилиши учун ноқонуний бериб юборилгани аниқланди. Оқибатда объектга жиддий зарар етказилган.
Жумладан, маданий мерос ёдгорлиги ҳисобланган Янгиқўрғон тумани «Гаистон» маҳалласида жойлашган «Гаистонтепа» археология ёдгорлигига оид ҳужжатлар туман кадастр ва қурилиш бўлими бошлиқлари томонидан қонунчилик талабларига зид равишда ер участкаларини бериш масаласини кўриб чиқувчи комиссияга тақдим этилган ва ушбу ҳудуд ноқонуний равишда фуқароларга дала ҳовли қуриш учун ажратилган.
Оқибатда археология ёдгорлиги 2020—2021 йиллар давомида фуқаро З.М. томонидан бузиб ташланиб, ўрнига уй-жой қурилган. Текшириш натижасига кўра жиноят иши қўзғатилиб, тергов ҳаракатлари олиб борилмоқда.
Изоҳ (0)