Ijtimoiy tarmoqlarda “Asakada uch-to‘rt kishi bir kishini dubinkalab urib tashlagani aytilmoqda”, degan xabar tarqaldi. Voqea yuzasidan Andijon viloyati IIB ma’lumot berdi.
Aniqlanishicha, voqea 2022-yilning 20-iyul kuni Asaka tumanining “Niyozbotir” mahallasida yuz bergan.
Mahalla hududida joylashgan savdo do‘koni oldida fuqaro M.Sh. qo‘shnisi voyaga yetmagan X.R bilan o‘zaro janjallashib, qo‘li bilan uning yuz qismiga urgan va yengil tan jarohati yetkazgan. Bundan achchiqlangan X.R.ning tog‘alari M.A., R.A. hamda M.A.lar bilan 21-iyul kuni soat taxminan 16:00 da fuqaro M.Sh.ning savdo do‘koniga borib, u bilan jiyanini urganligi masalasida gaplashib, janjallashib qolgan.
Janjal vaqtida M.Sh. qo‘li bilan M.A.ning yuziga urgan. M.A. va boshqalar esa qo‘li va tayoq bilan uning tanasiga urib, yengil tan jarohati yetkazgan.
Mazkur holat yuzasidan Asaka tuman ichki ishlar bo‘limi huzuridagi tergov bo‘linmasi tomonidan M.A. va boshqalarga nisbatan Jinoyat kodeksining 109-moddasi 2-qismi (qasddan badanga yengil shikast yetkazish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)