Toshkent shahrining Yunusobod va Mirzo Ulug‘bek tumanlarida kommunal to‘lovlar uchun undirilgan pullarni o‘zlashtirgan shirkatlar aniqlandi. Bu haqda Iqtisodiy jinoyatlarga qarshi kurashish departamenti xabar qildi.

Qayd etilishicha, Bosh prokuratura huzuridagi departamentning Yunusobod tumani bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan. Unda “S.K.” xususiy uy-joy mulkdorlari shirkati moddiy javobgar shaxslari xonadon egalaridan kommunal to‘lovlari uchun undirilgan jami 269,8 million so‘mni bank kassasiga kirim qilmasdan, talon-toroj qilgani aniqlangan.

Shu kabi holat Mirzo Ulug‘bek tumanida ham sodir bo‘lib, o‘tkazilgan tergovga qadar tekshiruvda “G‘.S.” xususiy uy-joy mulkdorlari shirkati rahbari D.S. aholidan kommunal to‘lovlari uchun undirilgan 95,2 million so‘m naqd pulni o‘zlashtirish yo‘li bilan talon-toroj qilgan.

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.