Самарқандда кўприкдан тушиб кетган «ЗИЛ» ҳайдовчиси рулни маст ҳолда бошқаргани маълум бўлди

Самарқанд шаҳрида 28 июль куни «ЗИЛ» юк машинаси кўприкдан тушиб кетганди. Йўл ҳаракати хавфсизлиги хизматининг маълум қилишича, ҳодисага ҳайдовчининг маст ҳолда автомобиль бошқаргани сабаб бўлган.

Қайд этилишича, 28 июль куни соат 11:40 атрофида Самарқанд шаҳрининг Бўстонсарой ва Рудакий кўчалари кесишган чорраҳада ҳаракатланиб келаётган «ЗИЛ» транспорт воситаси ҳайдовчиси М.Ч. рул бошқарувини йўқотиб, шу чорраҳадаги кўприкдан пастга тушиб кетган.

Ҳайдовчи тиббиёт бирлашмасига олиб борилиб, шифокор ёрдами кўрсатилган. Ҳозирда аҳволи яхши. Тиббиёт ходимлари томонидан текширув ўтказилганда у юк машинасини спиртли ичимлик истеъмол қилган ҳолда бошқаргани маълум бўлган.

Ҳолат юзасидан дастлабки суриштирув ишлари олиб борилмоқда.