O‘zbekiston eng ko‘p sotib olayotgan oziq-ovqat mahsulotlari ma’lum bo‘ldi

2022-yilning yanvar–iyun oylarida O‘zbekistonga import qilingan oziq-ovqat mahsulotlari hajmi 1,6 mlrd dollarni tashkil qildi. Bu haqda Davlat statistika qo‘mitasi ma’lum qildi. 

Oziq-ovqat importi o‘tgan yilning mos davriga nisbatan 35,8 foizga yoki 427 mln dollarga oshdi. 

O‘zbekiston yarim yilda eng ko‘p bug‘doy sotib oldi — 375,4 mln dollarlik. O‘tgan yili bu ko‘rsatkich 300,4 mln dollarni tashkil qilgan edi. 

Ikkinchi o‘rinda 185,3 mln dollar bilan shakarqamish qayd etilgan. Ushbu mahsulotning deyarli barchasi Braziliyadan keltiriladi. 

Margarin mahsulotlari importi qariyb 6 barobarga oshdi va uchinchi o‘ringa ko‘tarildi. Yanvar—iyun oylarida 155,7 mln dollarlik margarin sotib olingan. 

Bundan tashqari olma importi 6 barobarga ko‘payib, 10,2 mln dollarni tashkil qilgan. Yirik shoxli qoramol go‘shti, mandarin va arpa importi ham ikki barobarga oshgan. 

Eng ko‘p import qilingan 19 turdagi oziq-ovqat mahsulotlarining hajmi yarim yilda 2021-yilning mos davriga nisbatan ko‘paygan.