Qozog‘iston hukumati mamlakatdan avtomobil orqali ko‘mir olib chiqishni olti oyga taqiqlashi mumkin. Bu haqda Qozog‘iston Sanoat va infratuzilmani rivojlantirish vazirligining buyrug‘iga tayanib, Forbes xabar bermoqda.
Toshko‘mirdan olinadigan ko‘mir, briket, granula va shunga o‘xshash turdagi qattiq yoqilg‘ilarni Qozog‘iston hududidan olti oy muddatga avtomobil orqali olib chiqish taqiqlansin, — deyiladi jamoatchilik muhokamasi uchun e’lon qilingan buyruq loyihasida.
Ma’lumotlarga ko‘ra, 2021-yil sentabr oyidagi keskin sovuq munosabati bilan mamlakatning markaziy va shimoliy hududlarida ko‘mirga talab keskin oshgan.
Bundan ko‘mir xarid qilishning eng qizg‘in davrida uni ikki baravar qimmatga sotgan vijdonsiz olib-sotarlar foydalangan, — deyiladi xabarda.
Shu bilan birga, bu davrda avtomobil transportida ichki bozor uchun mo‘ljallangan ko‘mirning qo‘shni davlatlar – Qirg‘iziston va O‘zbekistonga eksporti ham oshgan.
Avvalroq 2022-yilda jahonning ko‘mirga bo‘lgan talabi 8 mlrd tonnaga yetishi haqida xabar berilgandi.
Izoh (0)