Buxoroda Isuzu urib yuborgan temir quvur 68 yoshli ayolning boshiga tegishi oqibatida fuqaro vafot etgani xabar berilgandi. Ushbu temir to‘siq G‘ijduvon tumani hokimi farmoyishiga asosan o‘rnatilgani ma’lum bo‘ldi. Bu haqda “Daryo”ga tuman hokimligi axborot xizmati rahbari ma’lum qildi.
Tumanning sobiq hokimi farmoyishga ko‘ra, tuman markazidagi “Degrezon” mahallasiga qarashli Mustaqillik hamda “Sardor” mahallasidagi Alpomish ko‘chalari hududida og‘ir yuk tashuvchi avtomobillar harakatini taqiqlash maqsadida temir to‘siq o‘rnatilgan. Ushbu temir to‘siq maxsus yo‘l belgilaridan biri sanalgan va unga rioya qilmagan avtomobillar harakati kuzatuv kameralari orqali nazorat qilinishi rejalashtirilgan.“Ushbu hududda og‘ir yuk tashuvchi avtotransport vositalarining harakatlanishini taqiqlash maqsadida tuman IIB boshlig‘iga to‘siqni buzib kirishga uringan yuk tashuvchi avtotransport vositalari haydovchilarining shaxsiga aniqlik kiritish, dastlabki surishtiruv ishlarini olib borgan holda javobgarlikka tortish topshirilgan”, — deydi mas’ullar.
Qo‘shimcha qilinishicha, hokim farmoyishda tuman IIB YHXBga ushbu hududda og‘ir yuk tashuvchi avtotransport vositalarining harakatlanmasligi uchun kunduzgi va tungi reydlar tashkil qilish va nazoratni kuchaytirish vazifasi yuklatilgan.
Temir to‘siqning balandligi 2,60 metr bo‘lib, yon-atrofida ham yuk avtomashinalarining harakatlanmasligini ko‘rsatib turuvchi boshqa belgilar o‘rnatilgan bo‘lgan.
Viloyat IIB boshlig‘i Shuhrat Aliyev mazkur voqea haqida gapirib, “Shu voqea sodir bo‘lgan paytda biz G‘ijduvon tumanida edik. O‘sha paytning o‘zida voqea joyiga bordik. Yuk mashinasi haydovchisi tartibga bo‘ysinmay, ya’ni cheklovga qaramasdan harakatda davom etgan. Haydovchi yuk mashinalari o‘tishi taqiqlangan ogohlantiruvchi belgini ko‘rdimi, o‘tib ketmasligi va aslida, umuman, u yo‘ldan harakatlanmasligi kerak edi. Haydovchi bu harakati bilan bir fuqaroning vafot etishiga sabab bo‘ldi. Bu temir to‘siqni o‘rnatgan qaysidir idora, tashkilot yoxud quruvchining aybi emas, vaholanki, haydovchining bu yo‘ldan harakatlanishining o‘zi qonunga xilof bo‘lgan”, — deydi Shuhrat Aliyev.
Yuk avtomashinasining egasi navoiylik ekani bildirilmoqda.
“Holat yuzasidan tergovga qadar tekshiruv harakatlari olib borilmoqda. Tekshiruv natijalari yuzasidan qo‘shimcha ma’lumot beriladi”, — dedi viloyat IIB matbuot xizmati rahbari Shuhrat Jalolov.
Izoh (0)