Ijtimoiy tarmoqlarda Toshkent shahar hokimining tegishli qarori asosida poytaxt maktablarining o‘qituvchilariga maktab formasi olish uchun ma’lum miqdorda mablag‘ ajratilgani xususidagi xabar keng muhokamalarga sabab bo‘lmoqda. Xalq ta’limi vazirligi ushbu holat yuzasidan munosabat bildirdi.
Ma’lum qilinishicha, maktab o‘qituvchilari uchun mamlakat miqyosida belgilangan va tasdiqlangan yagona majburiy forma turi mavjud emas.
Xalq ta’limi vazirligining 2020-yil 28-maydagi “Umumiy o‘rta ta’lim muassasasining ichki tartib va odob-axloq qoidalarini tasdiqlash to‘g‘risida” 131-sonli buyrug‘iga asosan, tizim xodimlarning ichki tartib va odob-axloq qoidalari belgilangan. Unga ko‘ra, o‘qituvchilar maktab darajasida belgilangan dress-kod talablariga rioya qilishlari zarur.
O‘qituvchi jamiyatning ziyoli va ma’rifat ulashuvchi a’zosi sifatida nafaqat ilmi va axloqi, balki kiyinish madaniyati bilan ham yoshlarga o‘rnak bo‘lishi maqsadga muvofiq. Ya’ni o‘qituvchilarning o‘z kasbiga xos bo‘lgan kiyimda bo‘lishi, albatta, o‘quvchilarda o‘z ustozi shaxsiyati va kasbiga bo‘lgan hurmatining yanada oshishiga sabab bo‘ladi.
“Shu o‘rinda Toshkent shahar hokimligining pul ajratganiga izoh sifatida Xalq ta’limi vazirligi poytaxt maktablari o‘qituvchilarning ijtimoiy himoyasi yo‘lidagi mazkur tashabbusini qo‘llab-quvvatlashini hamda bu g‘amxo‘rlikdan minnatdorligini bildirib o‘tadi. Boshqa hudud hokimlarini ham o‘qituvchilarni qo‘llab-quvvatlashda faollikka chaqirib qoladi”, – deyiladi vazirlik xabarida.
Izoh (0)