Бухорода Isuzu уриб юборган темир қувур 68 ёшли аёлнинг бошига тегиши оқибатида фуқаро вафот этгани хабар берилганди. Ушбу темир тўсиқ Ғиждувон тумани ҳокими фармойишига асосан ўрнатилгани маълум бўлди. Бу ҳақда «Дарё»га туман ҳокимлиги ахборот хизмати раҳбари маълум қилди.
Туманнинг собиқ ҳокими фармойишга кўра, туман марказидаги «Дегрезон» маҳалласига қарашли Мустақиллик ҳамда «Сардор» маҳалласидаги Алпомиш кўчалари ҳудудида оғир юк ташувчи автомобиллар ҳаракатини тақиқлаш мақсадида темир тўсиқ ўрнатилган. Ушбу темир тўсиқ махсус йўл белгиларидан бири саналган ва унга риоя қилмаган автомобиллар ҳаракати кузатув камералари орқали назорат қилиниши режалаштирилган.«Ушбу ҳудудда оғир юк ташувчи автотранспорт воситаларининг ҳаракатланишини тақиқлаш мақсадида туман ИИБ бошлиғига тўсиқни бузиб киришга уринган юк ташувчи автотранспорт воситалари ҳайдовчиларининг шахсига аниқлик киритиш, дастлабки суриштирув ишларини олиб борган ҳолда жавобгарликка тортиш топширилган», — дейди масъуллар.
Қўшимча қилинишича, ҳоким фармойишда туман ИИБ ЙҲХБга ушбу ҳудудда оғир юк ташувчи автотранспорт воситаларининг ҳаракатланмаслиги учун кундузги ва тунги рейдлар ташкил қилиш ва назоратни кучайтириш вазифаси юклатилган.
Темир тўсиқнинг баландлиги 2,60 метр бўлиб, ён-атрофида ҳам юк автомашиналарининг ҳаракатланмаслигини кўрсатиб турувчи бошқа белгилар ўрнатилган бўлган.
Вилоят ИИБ бошлиғи Шуҳрат Алиев мазкур воқеа ҳақида гапириб, «Шу воқеа содир бўлган пайтда биз Ғиждувон туманида эдик. Ўша пайтнинг ўзида воқеа жойига бордик. Юк машинаси ҳайдовчиси тартибга бўйсинмай, яъни чекловга қарамасдан ҳаракатда давом этган. Ҳайдовчи юк машиналари ўтиши тақиқланган огоҳлантирувчи белгини кўрдими, ўтиб кетмаслиги ва аслида, умуман, у йўлдан ҳаракатланмаслиги керак эди. Ҳайдовчи бу ҳаракати билан бир фуқаронинг вафот этишига сабаб бўлди. Бу темир тўсиқни ўрнатган қайсидир идора, ташкилот ёхуд қурувчининг айби эмас, ваҳоланки, ҳайдовчининг бу йўлдан ҳаракатланишининг ўзи қонунга хилоф бўлган», — дейди Шуҳрат Алиев.
Юк автомашинасининг эгаси навоийлик экани билдирилмоқда.
«Ҳолат юзасидан терговга қадар текширув ҳаракатлари олиб борилмоқда. Текширув натижалари юзасидан қўшимча маълумот берилади», — деди вилоят ИИБ матбуот хизмати раҳбари Шуҳрат Жалолов.
Изоҳ (0)