Xitoy Xalq Respublikasi raisi Si Szinpin bilan telefon suhbati chog‘ida AQSH prezidenti Jo Bayden, shu jumladan, COVID-19 pandemiyasi munosabati bilan, jamoatchilik salomatligi va ushbu sohadagi shaffoflik mavzusini ko‘tardi, deb yozadi “RBK” Oq uy vakili Karin Jan-Pyerga tayanib.
“Biz pandemiyaning kelib chiqishini aniqlash uchun ko‘proq ma’lumotlar kerakligini aytdik. Biz Xitoyni axborot bilan to‘liq bo‘lishishga va Jahon sog‘liqni saqlash tashkiloti bilan hamkorlik qilishga majburlash uchun butun dunyo bo‘ylab sheriklarimiz bilan ishlashda davom etyapmiz”, — dedi matbuot kotibi.
Xitoy 2019-yilda koronavirus bilan kasallanganlar aniqlangan birinchi mamlakatga aylangandi. Turli ma’lumotlarga ko‘ra, birinchi holat noyabrda yoki dekabrda Xubey provinsiyasida, xususan, Uxan shahrida qayd etilgan. XXRdan virus butun dunyoga tarqalishni boshladi — 2020-yil qishida ilk holatlar, masalan, Rossiya va AQSHda aniqlandi.
Koronavirusning kelib chiqishi bo‘yicha turli versiyalar ilgari surildi. Dastlab infeksiya o‘chog‘i Uxandagi hayvonlar va dengiz mahsulotlari bozori bo‘lgan, deb taxmin etilgandi. Ammo keyinroq xitoylik olimlar buni rad etib, virus ko‘rshapalaklarda paydo bo‘lib, so‘ng vositachi hayvon orqali odamga o‘tgan, degan xulosaga keldi. JSST bunday nazariyani ehtimolga yaqinroq deb atadi.
AQSH SARS-CoV-2 hujayrasiz hayot shakllari o‘rganiladigan va 2002—2003-yillarda boshqa bir koronavirus aniqlangan Uxan virusologiya institutida paydo bo‘lgan bo‘lishi mumkinligini ma’lum qildi. Ammo institutdagilar bunday virusni yaratish imkonsiz ekanini aytdi. AQSH razvedkasi keyinroq virus vujudga kelishining ehtimoliy sabablari sifatida kasallangan hayvondan yuqish yoki laboratoriyadan sizib chiqishi versiyalarini aytdi. JSST institutdan sizib chiqishini ehtimoldan uzoq deb atadi, ammo virusning kelib chiqishini o‘rganish uchun XXRdan barcha zarur hujjatlarni olmaganini ma’lum qildi.
Pekin, o‘z navbatida, mamlakatga virusni olib kirishda amerikalik harbiylarni aybladi, Vashington esa bu da’volarni yolg‘on deb atadi.
Hozirgi paytda Xitoyda kasallanish darajasi boshqa ba’zi mamlakatlarga nisbatan pastroq: Milliy sog‘liqni saqlash komissiyasi ma’lumotlariga ko‘ra, 27-iyul kuni u yerda 626 kishida virus aniqlangan. Xuddi shu kuni Rossiyada 11,5 mingta, AQSHda esa 151 mingta holat qayd etilgan.
Eslatib o‘tamiz, Xitoyning Uxan shahri hukumati to‘rt kishida koronavirus aniqlanganidan keyin shaharning qariyb 1 million aholi yashaydigan butun bir tumanini karantinga yopdi.
Izoh (0)