Iroqda inson huquqlari bo‘yicha sobiq vazir Muhammad al-Sudaniyning hukumat rahbari etib tayinlanishiga qarshi chiqqan va shia siyosatchisi Muqtada as-Sadr tarafdorlari bo‘lgan namoyishchilar mamlakat parlamentiga bostirib kirdi. Biroq as-Sadrning “uyga qaytish” haqidagi chaqirig‘idan so‘ng, olomon binoni tark etdi, deb yozmoqda Shafaq.
Agentlik ma’lumotlariga ko‘ra, parlamentga al-Sadrning “yuzlab” tarafdorlari kirib kelgan. Shundan so‘ng u Twitter’da namoyishchilarning murojaat xati “kelganini” va bu “korrupsionerlarni qo‘rqitayotganini” yozgan.
“Ikki rakat namoz o‘qing va eson-omon uyingizga qayting”, — degan as-Sadr namoyishchilarga.
Al Arabiya telekanaliga ko‘ra, namoyishchilar chiqib ketganidan so‘ng xavfsizlik kuchlari Bag‘doddagi hukumat va diplomatik muassasalar joylashgan Yashil hududni to‘sib qo‘yishga kirishgan va u yerga qo‘shimcha kuchlar yuborilgan.Telekanal manbasining qayd etishicha, bu choralar Islom inqilobi posbonlari korpusining “Quds” otryadi qo‘mondoni Ismoil Kaaniyning Bag‘dodga kelishi bilan bog‘liq. Mazkur otryad Eronning elita harbiy-siyosiy tuzilmasi hisoblanadi va u mamlakat tashqarisidagi operatsiyalarni amalga oshirish uchun javobgar.
2021-yilning oktabr oyida Iroqda parlament saylovlari bo‘lib o‘tgan, shundan so‘ng mamlakatda yangi bosh vazir tasdiqlanishi kerak edi, biroq haligacha bunday bo‘lmadi. Sadr tarafdorlari parlamentda ko‘pchilik ovozni qo‘lga kiritdi, ammo keyin ular parlamentni tark etdi.
Hozircha hukumatga 2020-yilda tayinlangan Mustafo Al-Kazimiy boshchilik qilmoqda. Al-Sudaniy nomzodini bir nechta shia partiyalarini birlashtirgan Muvofiqlashtiruvchi kuchlar ilgari surdi, namoyishchilar esa bunga qarshi chiqmoqda.
Shafaq nashriga ko‘ra, namoyishchilar dastlab Yashil hududga tutash, lekin undan tashqarida joylashgan Tahrir maydonida to‘plangan, so‘ng Dajla daryosi ustidagi ko‘prikdan o‘tib, hududga o‘tgan. U yerda ular hukumat hududiga bostirib kirish uchun beton bloklarni uloqtirgan.
Shundan so‘ng Al-Kazimiy namoyishchilarni Yashil hududni tark etib, inqirozni tinch yo‘l bilan hal qilishga chaqirdi, shuningdek, huquq-tartibot idoralaridan hukumat kvartalini himoya qilishni so‘radi.
Izoh (0)