Turkiya yonilg‘i sohasida kelishuv ishlab chiqmoqda, u Ukraina donini eksport qilish bo‘yicha 22-iyul kuni imzolangan shartnomaga o‘xshash bo‘ladi. Bu haqda mamlakat mudofaa vaziri Hulusiy Akar Al Jazeera telekanaliga bergan intervyusida aytib o‘tdi.
Uning so‘zlariga ko‘ra, muhokama qilinayotgan kelishuv global energetika inqirozini hal qilishga hissa qo‘shadi, biroq tayyorlanayotgan hujjatga oid boshqa tafsilotlar hozircha ma’lum qilinmagan.
Shu bilan birgalikda, Turkiya mudofaa vazirligi rahbari o‘z mamlakati Ukraina portlaridan g‘allani xavfsiz tashish rejasi ustida ishlayotganini ta’kidladi. Hulusiy Akar qurol kontrabandasi va provokatsiyalarni oldini olish maqsadida oziq-ovqat olib chiqiladigan kemalar Rossiya, Turkiya, Ukraina va BMT vakillari tomonidan tekshirilishini tasdiqladi.
22-iyul kuni Istanbulda jahon bozorlariga oziq-ovqat va o‘g‘it yetkazib berish muammosini hal etish bo‘yicha hujjatlar to‘plami imzolangan edi. Rossiya va BMT o‘rtasidagi memorandumga ko‘ra, jahon tashkiloti qishloq xo‘jaligi mahsulotlari va o‘g‘it eksportiga to‘sqinlik qiluvchi Rossiyaga qarshi cheklovlarni olib tashlash bo‘yicha ishlarda ishtirok etmoqda. Bundan tashqari Ukraina tomonidan nazorat qilinadigan Qora dengiz portlaridagi donni eksport qilish mexanizmini belgilash haqidagi yana bir hujjat mavjud.
Mavzuga doir: Ukraina, Turkiya va BMT o‘rtasida don eksporti bo‘yicha kelishuv imzolandi
Izoh (0)