Ироқда инсон ҳуқуқлари бўйича собиқ вазир Муҳаммад ал-Суданийнинг ҳукумат раҳбари этиб тайинланишига қарши чиққан ва шиа сиёсатчиси Муқтада ас-Садр тарафдорлари бўлган намойишчилар мамлакат парламентига бостириб кирди. Бироқ ас-Садрнинг «уйга қайтиш» ҳақидаги чақириғидан сўнг, оломон бинони тарк этди, деб ёзмоқда Шафақ.
Агентлик маълумотларига кўра, парламентга ал-Садрнинг «юзлаб» тарафдорлари кириб келган. Шундан сўнг у Twitter’да намойишчиларнинг мурожаат хати «келганини» ва бу «коррупционэрларни қўрқитаётганини» ёзган.
«Икки ракат намоз ўқинг ва эсон-омон уйингизга қайтинг», — деган ас-Садр намойишчиларга.
Al Arabiya телеканалига кўра, намойишчилар чиқиб кетганидан сўнг хавфсизлик кучлари Бағдоддаги ҳукумат ва дипломатик муассасалар жойлашган Яшил ҳудудни тўсиб қўйишга киришган ва у ерга қўшимча кучлар юборилган.Телеканал манбасининг қайд этишича, бу чоралар Ислом инқилоби посбонлари корпусининг «Қудс» отряди қўмондони Исмоил Каанийнинг Бағдодга келиши билан боғлиқ. Мазкур отряд Эроннинг элита ҳарбий-сиёсий тузилмаси ҳисобланади ва у мамлакат ташқарисидаги операцияларни амалга ошириш учун жавобгар.
2021 йилнинг октябрь ойида Ироқда парламент сайловлари бўлиб ўтган, шундан сўнг мамлакатда янги бош вазир тасдиқланиши керак эди, бироқ ҳалигача бундай бўлмади. Садр тарафдорлари парламентда кўпчилик овозни қўлга киритди, аммо кейин улар парламентни тарк этди.
Ҳозирча ҳукуматга 2020 йилда тайинланган Мустафо Ал-Казимий бошчилик қилмоқда. Ал-Суданий номзодини бир нечта шиа партияларини бирлаштирган Мувофиқлаштирувчи кучлар илгари сурди, намойишчилар эса бунга қарши чиқмоқда.
Шафақ нашрига кўра, намойишчилар дастлаб Яшил ҳудудга туташ, лекин ундан ташқарида жойлашган Таҳрир майдонида тўпланган, сўнг Дажла дарёси устидаги кўприкдан ўтиб, ҳудудга ўтган. У ерда улар ҳукумат ҳудудига бостириб кириш учун бетон блокларни улоқтирган.
Шундан сўнг Ал-Казимий намойишчиларни Яшил ҳудудни тарк этиб, инқирозни тинч йўл билан ҳал қилишга чақирди, шунингдек, ҳуқуқ-тартибот идораларидан ҳукумат кварталини ҳимоя қилишни сўради.
Изоҳ (0)