Bollivudning dunyoga mashhur aktyorlaridan biri, filmlardagi komedik ijrosi orqali ko‘plab muxlislarning qalbidan joy olgan Jonni Lever yillar davomida tomoshabinlarning yuzida tabassum paydo bo‘lishiga sababchi bo‘ldi.
Aktyorning filmlardagi qahramonlari har qanday keskin vaziyatni bartaraf etishga, hatto yovuz odamning uyini ham kulgi maskaniga aylantirishga qodir. Jonni Hindistonning taniqli komediyachilaridan biri va ko‘plab mukofotlar g‘olibi hisoblanadi. Aktyor Filmfare Awards tomonidan beriladigan “Yilning eng yaxshi komediya ustasi” nominatsiyasida “Muhabbat azobi” va “Kuyov Raja” filmlaridagi ijrosi uchun rekord darajada g‘oliblikni qo‘lga kiritgan. U o‘z faoliyatini 1984-yilda boshlagan va 300 dan ortiq filmlarida suratga tushgan.
Jonnining asl ismi Jon Prakash Rao Janumala. U 1957-yil 14-avgustda telugu nasroniy oilasida tug‘ilgan. Bolaligining ko‘p qismini Mumbay shahri atrofidagi tor ko‘chalarda o‘tkazgan. Jonnining otasi Hindustan Lever kompaniyasida operator bo‘lib ishlagan. Uning maoshi oilani boqishga zo‘rg‘a yetgan, sababi olti farzandni (uch o‘g‘il va uch qizni) boqish uchun ko‘proq mablag‘ kerak bo‘lgan.
Bo‘lajak aktyor maktabda 7-sinfgacha tahsil olgan va ota-onasining puli yo‘qligi sababli maktabni tashlab ketishga majbur bo‘lgan. U dastlab ko‘chalarda qalam sotgan, mashhur treklarga raqsga tushgan va Bollivud aktyorlariga taqlid qilgan. Keyin uning otasi o‘zi ishlayotgan kompaniyaga ishchi qilib oladi va aktyor u yerda 6 yil ishlaydi.
Aktyor ishdan tashqari mimikani o‘rgandi va sahna ko‘rinishlarini kuzatdi, ayniqsa amerikalik xonanda Elvis Presliga taqlid qilishni boshladi. Shu mahorati tufayli u o‘zi ishlayotgan kompaniyada o‘tkazilgan tadbirda nutq so‘zladi. Ziyofatda Jon hokimiyatni a’lo darajada taqlid qildi va shundan keyin hamma uni “Jonni Lever” deb atay boshladi. Bu taxallus oxir-oqibat uning hayotida abadiy muhrlandi.
“Kino sanoatiga kirishim qiyin edi. Dastlab men o‘zimni taqlid qilish yo‘nalishida sinab ko‘rdim. Mening mashhurligim Ashok Kumar, Om Prakash, Shatrugan Singh va Sanjiv Kumarni taqlid qilganimdan keyin yanada ortdi. Aktyor Sunil Datt tufayli katta ekranga chiqdim, u mendagi salohiyatni ko‘rib, o‘zining 1982-yilda suratga olingan ‘Og‘riqlar bog‘lari’ filmida epizod rollardan birini o‘ynashni taklif qildi” , — deydi aktyor.
“Mening hamkasblarim men haqimda turli xil yomon gaplarni aytganini eshitdim. ‘U shunchaki taqlidchi. Aktyorlik haqida nimani biladi?’ , — deyishdi. Ammo karyeram rivojlanib borar ekan, men taqlid qilishdan qocha boshladim va qahramonlarimning shaxsiyatiga e’tibor qaratdim. ‘O‘lim bilan o‘ynashish’, ‘Muvaffaqiyatsiz o‘g‘irlik’, “Titrar yuraklar’, ‘Yoningizda’ va ‘Hayotda hamma narsa bo’ladi’ filmlarini faoliyatimdagi eng yaxshi kinolar deb bilaman” , — deydi Jonni Lever.
Jonnining birinchi mashhurlikka erishgan filmi “O‘lim bilan o‘ynashish” kinokartinasi bo‘ldi, shundan so‘ng u ko‘plab filmlarda ikkinchi darajali aktyor yoki komediyachi sifatida tanlandi. Kino olamga o‘tganiga qaramay, Jonni jonli chiqishlarni davom ettirdi va 90-yillarda o‘z karyerasining cho‘qqisiga yetdi. Keyin esa uning hayotida baxtsiz hodisa yuz berdi.
Uning 10 yoshli o‘g‘li Jessiga tomoq saratoni tashxisi qo‘yildi. “Mening o‘g‘lim saraton kasalligiga chalingan. Ojiz edim. Shundan keyin filmlarda rol o‘ynashni to‘xtatdim va u uchun ibodat qilishni boshladim. Keyin o‘g‘lim yana tekshiruvdan o‘tkazildi va shifokorlar hayratda qoldi, chunki saraton yo‘qolgan edi. Men uchun bu yangi hayotning boshlanishi edi. Men katolik oilasida tug‘ilganman, lekin hech qachon Bibliyani o‘qimaganman. O‘g‘lim tuzalib ketganidan keyin men Xudoga ishona boshladim va Bibliyani to‘liq o‘qib chiqdim. Avliyo emasman, lekin hozir men Xudoga va ibodatlarga har qachongidan yaqinroqman” , — deb tan oladi Jonni.
Aktyor Sujata ismli ayol bilan turmush qurgan. Jonnining o‘g‘li Jessi komediya yo‘nalishida ijod qiladi, qizi Jeymi esa aktrisa sifatida tanilgan. Lever faoliyati davomida 300 dan ortiq filmlarda suratga tushgan. U ulkan muvaffaqiyatga erishishiga qaramay kamtarligini yo‘qotmadi. Jonnining kino olamdagi hamkasblari uni o‘ziga xos iste’dod egasi deb e’tirof etgan. Aktyor har doim o‘z ishida intizomli. U belgilangan vaqtdan bir soat oldin suratga olish ishlariga keladi, bu esa hindlar orasida juda kam uchraydi.
Lever filmlarda kam ko‘rinish bersa ham tomoshabinlar u ekranda paydo bo‘lganda xursand bo‘ladi. Aktyor tez kunlarda namoyish etilishi kutilayotgan, Ranvir Singx ikkita rolni ijro etgan Rohit Shettining “Sirk” kinokomediyasida suratga tushdi.
Izoh (0)