Болливуднинг дунёга машҳур актёрларидан бири, фильмлардаги комедик ижроси орқали кўплаб мухлисларнинг қалбидан жой олган Жонни Левер йиллар давомида томошабинларнинг юзида табассум пайдо бўлишига сабабчи бўлди.
Актёрнинг фильмлардаги қаҳрамонлари ҳар қандай кескин вазиятни бартараф этишга, ҳатто ёвуз одамнинг уйини ҳам кулги масканига айлантиришга қодир. Жонни Ҳиндистоннинг таниқли комедиячиларидан бири ва кўплаб мукофотлар ғолиби ҳисобланади. Актёр Filmfare Awards томонидан бериладиган «Йилнинг энг яхши комедия устаси» номинациясида «Муҳаббат азоби» ва «Куёв Ража» фильмларидаги ижроси учун рекорд даражада ғолибликни қўлга киритган. У ўз фаолиятини 1984 йилда бошлаган ва 300 дан ортиқ фильмларида суратга тушган.
Жоннининг асл исми Жон Пракаш Рао Жанумала. У 1957 йил 14 августда телугу насроний оиласида туғилган. Болалигининг кўп қисмини Мумбай шаҳри атрофидаги тор кўчаларда ўтказган. Жоннининг отаси Hindustan Lever компаниясида оператор бўлиб ишлаган. Унинг маоши оилани боқишга зўрға етган, сабаби олти фарзандни (уч ўғил ва уч қизни) боқиш учун кўпроқ маблағ керак бўлган.
Бўлажак актёр мактабда 7-синфгача таҳсил олган ва ота-онасининг пули йўқлиги сабабли мактабни ташлаб кетишга мажбур бўлган. У дастлаб кўчаларда қалам сотган, машҳур трекларга рақсга тушган ва Болливуд актёрларига тақлид қилган. Кейин унинг отаси ўзи ишлаётган компанияга ишчи қилиб олади ва актёр у ерда 6 йил ишлайди.
Актёр ишдан ташқари мимикани ўрганди ва саҳна кўринишларини кузатди, айниқса америкалик хонанда Элвис Преслига тақлид қилишни бошлади. Шу маҳорати туфайли у ўзи ишлаётган компанияда ўтказилган тадбирда нутқ сўзлади. Зиёфатда Жон ҳокимиятни аъло даражада тақлид қилди ва шундан кейин ҳамма уни «Жонни Левер» деб атай бошлади. Бу тахаллус охир-оқибат унинг ҳаётида абадий муҳрланди.
«Кино саноатига киришим қийин эди. Дастлаб мен ўзимни тақлид қилиш йўналишида синаб кўрдим. Менинг машҳурлигим Ашок Кумар, Ом Пракаш, Шатруган Сингҳ ва Санжив Кумарни тақлид қилганимдан кейин янада ортди. Актёр Сунил Датт туфайли катта экранга чиқдим, у мендаги салоҳиятни кўриб, ўзининг 1982 йилда суратга олинган ‘Оғриқлар боғлари’ фильмида эпизод роллардан бирини ўйнашни таклиф қилди» , — дейди актёр.
«Менинг ҳамкасбларим мен ҳақимда турли хил ёмон гапларни айтганини эшитдим. ‘У шунчаки тақлидчи. Актёрлик ҳақида нимани билади?’ , — дейишди. Аммо карьерам ривожланиб борар экан, мен тақлид қилишдан қоча бошладим ва қаҳрамонларимнинг шахсиятига эътибор қаратдим. ‘Ўлим билан ўйнашиш’, ‘Муваффақиятсиз ўғирлик’, «Титрар юраклар’, ‘Ёнингизда’ ва ‘Ҳаётда ҳамма нарса бўлади’ фильмларини фаолиятимдаги энг яхши кинолар деб биламан» , — дейди Жонни Левер.
Жоннининг биринчи машҳурликка эришган фильми «Ўлим билан ўйнашиш» кинокартинаси бўлди, шундан сўнг у кўплаб фильмларда иккинчи даражали актёр ёки комедиячи сифатида танланди. Кино оламга ўтганига қарамай, Жонни жонли чиқишларни давом эттирди ва 90 йилларда ўз карьерасининг чўққисига етди. Кейин эса унинг ҳаётида бахтсиз ҳодиса юз берди.
Унинг 10 ёшли ўғли Жессига томоқ саратони ташхиси қўйилди. «Менинг ўғлим саратон касаллигига чалинган. Ожиз эдим. Шундан кейин фильмларда рол ўйнашни тўхтатдим ва у учун ибодат қилишни бошладим. Кейин ўғлим яна текширувдан ўтказилди ва шифокорлар ҳайратда қолди, чунки саратон йўқолган эди. Мен учун бу янги ҳаётнинг бошланиши эди. Мен католик оиласида туғилганман, лекин ҳеч қачон Библияни ўқимаганман. Ўғлим тузалиб кетганидан кейин мен Худога ишона бошладим ва Библияни тўлиқ ўқиб чиқдим. Авлиё эмасман, лекин ҳозир мен Худога ва ибодатларга ҳар қачонгидан яқинроқман» , — деб тан олади Жонни.
Актёр Сужата исмли аёл билан турмуш қурган. Жоннининг ўғли Жесси комедия йўналишида ижод қилади, қизи Жейми эса актриса сифатида танилган. Левер фаолияти давомида 300 дан ортиқ фильмларда суратга тушган. У улкан муваффақиятга эришишига қарамай камтарлигини йўқотмади. Жоннининг кино оламдаги ҳамкасблари уни ўзига хос истеъдод эгаси деб эътироф этган. Актёр ҳар доим ўз ишида интизомли. У белгиланган вақтдан бир соат олдин суратга олиш ишларига келади, бу эса ҳиндлар орасида жуда кам учрайди.
Левер фильмларда кам кўриниш берса ҳам томошабинлар у экранда пайдо бўлганда хурсанд бўлади. Актёр тез кунларда намойиш этилиши кутилаётган, Ранвир Сингх иккита ролни ижро этган Роҳит Шеттининг «Цирк» кинокомедиясида суратга тушди.
Изоҳ (0)