Эрон Россия билан рус самолётлари учун эҳтиёт қисмлар ва жиҳозларни етказиб бериш, шунингдек, самолётларни таъмирлаш ва техник хизмат кўрсатишни назарда тутувчи шартнома имзолади. Бу ҳақда Эрон фуқаро авиацияси бошқармасига таяниб, Mehr агентлиги хабар берди.
Битим Россия транспорт вазирининг ўринбосари (Mehr унинг исмини келтирмаган) Эронга ташрифи чоғида Эрон фуқаро авиацияси бошқармаси раҳбари Муҳаммад Муҳаммадий-Бахш билан учрашганида имзоланган.
Томонлар, шунингдек, Россия ва Эрон ўртасидаги рейслар сонини ҳафтасига 35 тагача оширишга келишиб олган.
Россия Украинага бостириб кирганидан сўнг, Европа Иттифоқи рус самолётлари учун осмонни ёпган, улар учун эҳтиёт қисмларни етказиб беришни, техник хизмат кўрсатишни, уларни қўллаб-қувватлаш ва суғурталашни тақиқлаган эди, шунингдек, лизинг фирмаларини Россия ташувчиларига ижарага берилган самолётларни қайтариб олишга мажбур қилган.
Июль ойида АҚШ расмийлари Россия Украинадаги урушда фойдаланиш учун Эрондан бир неча юзлаб дрон сотиб олишни режалаштираётганини маълум қилганди. Эрон бундай режаларни рад этди. Бир неча кун олдин Украинанинг «Senzor.net» нашри дронларнинг биринчи партияси аллақачон Россияга юборилгани ҳақида хабар берди. Аммо Оқ уйнинг таъкидлашича, у дронлар сотиб олингани ва етказиб берилганидан далолат берувчи аломатларни ҳали кўрмаган.
Июль ойи ўрталарида Россия президенти Владимир Путин Теҳронга ташриф буюрди, у ерда Сурия бўйича келишувга кафил давлатлар: Россия, Эрон ва Туркия саммити бўлиб ўтди. Путин учун бу Украина босқинидан кейин собиқ Совет Иттифоқи давлатларидан ташқарига биринчи ташриф бўлди.
Изоҳ (0)