Filippinning Luson orolida 7,0 magnitudali zilzila yuz berdi. Bu haqda respublika Vulkanologiya va seysmologiya institutiga tayanib, “RBK” xabar bermoqda. Dastlab 7,3 magnitudali zilzila haqida xabar berilgandi.
Transport vazirligining bildirishicha, zilzila Manila metropolitenida sezilgan. U yerda tirbandlik soatida poyezdlar harakati to‘xtatilgan.
Filippin prezidenti kichik Ferdinand Markos zilziladan jabr ko‘rgan Abra provinsiyasiga zudlik bilan qutqaruv guruhlarini jo‘natishni buyurdi, deb xabar berdi uning matbuot xizmati.
Abra provinsiyasidagi Lagangilang shahri meri Rovelin Villamorning aytishicha, hukumatga uylar vayron bo‘lgani haqida xabarlar kelib tushgan. Bundan tashqari, shifoxona jiddiy shikastlangan, binosi qulab tushgan. “Biz uylarga zarar yetkazilgani haqida xabar oldik. Ammo hozircha qurbonlar yo‘q”, — dedi shahar hokimi.
23-iyul kuni Eronda seysmologlar ikkita zilzila qayd etgan edi, ulardan biri 5,4 magnitudali, deb xabar bergan Yevropa-O‘rtayer dengizi seysmologiya markazi (EMSC).
Oy boshida mamlakat janubidagi Hormozgan viloyatida silkinishlar qayd etilgan. O‘shanda uch kishi halok bo‘lgan, 19 kishi yaralangan, deb yozdi Reuters Favqulodda vaziyatlar boshqarmasiga tayanib.
Izoh (0)