Amsterdamdagi xalqaro aeroport ekologiya foydasiga reyslar sonini qisqartirmoqda

Amsterdamning Sxiphol aeroporti iqlim o‘zgarishi, shovqin va havo ifloslanishiga qarshi kurashish uchun yillik qabul qilinadigan reyslar sonini kamaytirmoqchi. Bu haqda Travel Pulse xabar berdi.

Sxiphol aeroporti rahbariyati havo bandargohi har yili u orqali o‘tadigan reyslar sonini kamaytirishi haqida e’lon qilgan. Niderlandiya rasmiylari buning bir qancha sabablarini tilga olgan, ammo ulardan asosiysi iqlim o‘zgarishi, shovqin va havo ifloslanishiga qarshi kurashdir.

Qayd etilishicha, 2023-yildan boshlab Sxiphol aeroporti orqali o‘tishiga ruxsat beriladigan samolyotlar soni yiliga 440 mingtagacha cheklanadi. Hozir ularning soni 500 mingga yetgan.

“Aviatsiyaning odamlarga, atrof-muhitga va tabiatga salbiy ta’sirini kamaytirishga e’tibor qaratish lozim”, — deyiladi Transport vazirligi xabarida.

Greenpeace aviatsiya eksperti Devi Zlox bu harakatni tarixiy yutuq deb atadi va parvozlarni qisqartirish tabiat, salomatlik hamda iqlim uchun zarurligini aytdi.

Sxiphol Niderlandiyaning asosiy xalqaro aeroporti, Yevropada esa uchinchi eng gavjum aeroportdir.