Associated Press agentligining xabar berishicha, Germaniyaning sharqiy qismi va Chexiya shimolida bir necha yuz o‘t o‘chiruvchilar o‘rmon yong‘inlari bilan keskin kurashmoqda.
Olov quruq qarag‘ay o‘rmonlari ko‘p bo‘lgan Brandenburg federal shtati bo‘ylab tez sur’atlarda tarqalgan. O‘t o‘chiruvchilar u erda juda ehtiyotkorlik bilan harakat qilishlariga to‘g‘ri kelmoqda, chunki bu hududda hali ham Ikkinchi jahon urushidan qolgan o‘q-dorilarga qoqilib ketish xavfi yuqori.
Xususan, eski o‘q-dorilar yer tubida yotadigan Refeld qishlog‘iga sapyorlar (harbiy qurilish qismlarining ofitserlari) guruhi yuborilgan. Bu yerdagi yong‘inni o‘chirishga ikkita harbiy vertolyot jalb etilgan, ammo o‘q-dorilar portlashi mumkinligidan xavfsirab, hududga o‘t o‘chiruvchilar kiritilmagan.
Germaniyada yong‘inni o‘chirish paytida yetti nafar o‘t o‘chiruvchi tan jarohati olgan.
Shu bilan birgalikda, yakshanba (24-iyul) kuni Shveysariyaning Bogemiya milliy bog‘ida yong‘in boshlandi, uning tarqalishiga esa bir kun oldingi shamolli ob-havo sabab bo‘lgan.
Rasmiylar Chexiya bilan chegaradosh Xrjensko shahridan 80 kishini evakuatsiya qilgan. 400 nafar o‘t o‘chiruvchi esa yong‘inni o‘chirishga muvaffaq bo‘lgan, biroq vaziyat hali o‘z o‘rniga qaytganicha yo‘q, olov chegara orqali Germaniyaning Saksoniya federal shtatiga ham o‘tgan.
Polsha va Slovakiya chexiyalik o‘t o‘chiruvchilarga yordam berish uchun vertolyotlar jo‘natilganini e’lon qildi. Shuningdek, nemis harbiylari yong‘inni bartaraf etish uchun Chexiyaga to‘rtta vertolyot jo‘natishga va’da bergan.
Mavzuga doir: Fransiyadagi yong‘inlar qariyb 20 ming gektar o‘rmonni yo‘q qildi
Izoh (0)