Buyuk Britaniya Alisher Usmonovning jiyanlari hamda 29 nafar rossiyalik gubernatorga qarshi sanksiyalar kiritdi

Buyuk Britaniya Rossiyaning Ukrainaga bosqini sabab yana 42 kishiga nisbatan sanksiyalar joriy qildi. Yangilangan sanksiyalar ro‘yxati Britaniya hukumati saytida e’lon qilingan.

Britaniya sanksiyalari ostiga, jumladan, tadbirkor Alisher Usmonovning jiyanlari Sarvar va Sanjar Ismoilovlar tushgan.

Shuningdek, Buyuk Britaniya Rossiyaning 29 ta hududi gubernatorlariga nisbatan sanksiyalar kiritdi. Ular orasida Andrey Vorobyev (Moskva viloyati gubernatori), Aleksandr Bogomaz (Bryansk viloyati), Roman Starovoyt (Kursk viloyati), Yevgeniy Kuyvashev (Sverdlovsk viloyati), Aleksey Teksler (Chelyabinsk viloyati), Vladimir Uyba (Komi) bor.

Rossiya adliya vaziri Konstantin Chuychenko va uning o‘rinbosari Oleg Sviridenko ham sanksiyalar ostida qolgan. Bundan tashqari, Sputnik International bosh muharriri Anton Anisimov, britaniyalik bloger Grem Fillips, o‘zini o‘zi respublika deb e’lon qilgan LXR vakillari, shuningdek, Suriya va Falastindan kelgan muhojirlarga ham cheklovlar joriy etildi.