Saudiya Arabistoni 120 kilometr uzunlikdagi, ko‘zguli oyna bilan qoplangan Mirror Line osmono‘par binosini qurish rejasini e’lon qildi. U cho‘lda quriladi va mamlakatga 1 trillion dollarga tushadi. Mirror Line binosi Neom cho‘l shahrining bir qismiga aylanadi — shahar haqida 2021-yilning yanvar oyida Saudiya Arabistoni valiahd shahzodasi Muhammad bin Salmon e’lon qilgandi.
Mirror Line balandligi taxminan 500 metr bo‘lgan ikkita binodan iborat bo‘ladi, ular 120 kilometrli cho‘l, qirg‘oq va tog‘ landshaftlari orqali bir-biriga parallel ravishda turadi. Shahzoda Muhammad qurilishni 2030-yilgacha yakunlash niyatida, ammo muhandislar bunga 50 yil ketishi mumkinligini aytmoqda
Bino juda uzun bo‘lgani uchun Yerning egriligini hisobga olgan holda u tirgaklarga o‘rnatiladi, uning ostidan esa tezyurar temir yo‘l liniyasi o‘tadi. Osmono‘par bino Aqaba ko‘rfazidan tog‘ tizmasi va qirg‘oq orqali cho‘l “aerotropolisi”gacha cho‘ziladi.
Salmonning so‘zlariga ko‘ra, loyiha aholi bir-biriga piyoda 5 daqiqada yetib borishi, shuningdek, 20 daqiqa ichida binoning bir chetidan ikkinchi chetiga o‘tishiga mo‘ljallab ishlab chiqilgan. Xabar qilinishicha, Mirror Line qayta tiklanadigan energiyadan quvvatlanadi.
Wall Street Journal ma’lumotlariga ko‘ra, binolar 5 million kishiga mo‘ljallangan bo‘lib, tezyurar poyezddan tashqari, qayiq prichalini (kema, qayiqlar bog‘lab qo‘yiladigan joy) ham o‘z ichiga oladi.
Mirror Line, shuningdek, yerdan taxminan 300 metr balandlikda joylashgan stadionga ega bo‘ladi. Salmonning ta’kidlashicha, binolar butunlay ugleroddan holi va ekologiya uchun xavfsiz bo‘ladi. Shuningdek, u Neom loyihasining o‘zi minglab yangi ish o‘rinlarini yaratishiga va neftga boy mamlakatning tabiiy resurslarga qaramligini kamaytirishga yordam berishiga umid qilmoqda.
Biroq loyiha ba’zi qiyinchiliklarga ham duch kelmoqda. G‘arb davlatlari va Saudiya o‘rtasidagi munosabatlarda inson huquqlarining buzilishi haqidagi da’volar bilan bog‘liq muammolar tufayli Neom xorijdan sarmoya olmasligi mumkin. Ba’zilar, shuningdek, ishlab chiqilayotgan loyihalarni juda xayoliy, deb hisoblamoqda.
Avval moliyalashtirishdagi qiyinchiliklar tufayli Saudiya Arabistoni balandligi 1,6 kilometr bo‘lgan, dunyodagi eng baland osmono‘par binoni qurish rejasidan voz kechgan edi. Hozir Mirror Line va Neom neftning narxi oshishi hisobidan moliyalashtirilmoqda.
Atrof-muhitni rejalashtirish bo‘yicha mutaxassilar Mirror Line ko‘chmanchi qushlarning migratsiya yo‘llariga to‘siq bo‘lishidan, ko‘zguli binolar ularni yo‘nalishdan chalkashtirib yuborishidan xavotirlanmoqda.
Izoh (0)