Xorij aktyorlarining rol uchun tashqi qiyofasini o‘zgartirgani haqidagi ma’lumotlarni ko‘p eshitganmiz. Aslida bu o‘zbek aktyorlari uchun ham yangilik emas. Chunki ular hamisha rolning ishonchli chiqishi uchun tashqi qiyofalarini o‘zgartirishga, hatto qisqa muddatda bir necha kilogramm vazn tashlashga ham tayyor. “Daryo” muxbiri Nargizaxon Murodova quyida ana shunday fidoiy aktyorlar haqida ma’lumot beradi.
Nigina Anorboyeva
Aktrisa Nigina Anorboyeva Rustam Meliyev tomonidan suratga olinayotgan “Ofitser” filmidagi roli uchun uzun qora sochlarini kaltalatishga rozi bo‘ldi.
— Yaxshi rol imidj o‘zgartirishga arziydi. Rejissor Rustam Meliyev sochlarimni kaltalatishni so‘radi, bu taklif o‘zimga ham yoqdi. Men hamisha o‘ziga xos xarakter va qiyofadagi rollarni kutib yashayman. Soch o‘sadigan narsa, ammo yaratilgan rol tarixga muxrlanadi, — deydi aktrisa Nigina Anorboyeva.
Barchin G‘ofurova
Ko‘plab muhokamalarga sabab bo‘lgan “Baxt ovchisi” serialida Zulya rolini ijro etgan aktrisa Barchin G‘ofurova ham rol uchun sochini kaltalatishga qaror qilgan.
— Sochlarim avval uzun va qop-qora rangda edi. “Ishq o‘yinlari” seriali rejissori Ozod Shams rol uchun sochlarimni kaltalatishni so‘radi. Rozi bo‘lib, sochlarimni kaltalatgandim. “Baxt ovchisi” seriali prodyuseri va rejissori sochimni sariq rangga bo‘yashimni so‘radi. Xullas, rol sabab uslubim butunlay o‘zgarib ketdi, — deydi aktrisa Barchin G‘ofurova.
Ulug‘bek Qodirov
Aktyor Ulug‘bek Qodirov uchun qisqa muddatda ozishga yoki semirish muammo emas. U “Aka” filmi uchun 26 kilogrammga semirgan. “Baron” filmi uchun esa avvalgi vazniga qaytishiga to‘g‘ri kelgan. Aktyor qisqa vaqtda 25 kilogramm vazn tashlashga muvaffaq bo‘lgan. Aktyorning ta’kidlashicha, u to‘plagan 120 kilogramm vazndan rol va salomatligi uchun voz kechishiga to‘g‘ri kelgan.
— Bu yil ham rol uchun katta vazn tashlashimga to‘g‘ri keldi. “Osiyo arsloni” filmida asosiy rol ijro etayapman. Kuchaytirilgan parhez sabab 25 kilogramm vazn tashladim, — deydi aktyor Ulug‘bek Qodirov.Ma’lumot uchun, “O‘zbekfilm” hamda “Belarusfilm” Milliy kinostudiyasi o‘rtasida hamkorlikda “Osiyo arsloni” nomli filmda bosh rolni Ulug‘bek Qodirov ijro etadi. Mazkur biografik drama O‘zbekiston va Belarusda suratga olinadi va kelgusi yil 9-mayda premyerasi bo‘lib o‘tadi.
Asal Shodiyeva
Aktrisa Asal Shodiyeva 2012-yili “Hay-hay qizaloq” filmida Yulduz rolini ijro etgan. Aktrisa mazkur rol uchun sochlarini antiqa tarzda kaltalatgan va rangli ulama sochlardan foydalangan. Hamisha nafis imijda ko‘ringan aktrisaning mazkur ko‘rinishi tezda e’tiborni tortgan. U zamonaviylikka intiladigan va milliy qadriyatlarni unutgan qiz rolini mohirlik bilan ijro etgan.
— “Hay-hay qizaloq” filmini ko‘p marta tomosha qilganman. Boisi, filmdagi rolim o‘zimga yoqadi. O‘ziga xoslik va yangicha yondashuv bor, — deydi Asal Shodiyeva.
Bahrom Matjonov
Ayni kunlarda AQSHda istiqomat qiladigan aktyor Bahrom Matjonov “Ibrat” filmida suratga tushish uchun uch oy soqolini o‘stirgan. “Faridaning ikki ming qo‘shig‘i” filmiga taklif etilganida esa sochlarini qirtishlab oldirishiga to‘g‘ri kelgan. Rol mazkur imijni talab etgani uchun u soch-soqolidan osongina voz kechgan.
Boir Xolmirzayev
O‘zbekistonda xizmat ko‘rsatgan artist Boir Xolmirzayev “Mendirman Jaloliddin” seriali uchun boshqa aktyorlar singari soch va soqolini o‘stirdi. Bu natijaga erishish uchun u taxminan ikki yil sarfladi. Serialda ishtirok etuvchi boshqa aktyorlardan farqli ravishda uning sochlari ancha uzun.
Lola
Bundan roppa-rosa 7 yil avval xonanda Lola “Xayr” nomli qo‘shig‘iga klip suratga olgan. Klip o‘ziga xosligi bilan boshqa kliplarga o‘xshamaydi. Ya’ni xonanda yuz qiyofasi orqali inson borliqdan yo‘qlikka o‘tib qolishi aks ettirilgan. Imij o‘zgarishida grimyorning mahoratini sezish qiyin emas. Xonanda klip uchun sochlarini oldirmagan. Shunchaki, boshiga niqob kiygan xolos.
Sitora Alimjonova va Ali Otajonov
Bahrom Nazarovning “Hijron” klipida Sitora Alimjonova va Ali Otajonov uchun shunga o‘xshash imij yaratilgan. Ya’ni ular boshlariga niqob kiyib bemor odam rolini ijro etgan. Ijro va mohirlik bilan yaratilgan imij sabab klip ta’sirli chiqqan.
Mavzuga doir:
Izoh (0)