Xonanda Shahnoza Otaboyeva MY5 telekanalining “Omon-omon” ko‘rsatuviga bergan inyervyusida vazni sababli 5 yil sahnada ko‘rinish bermagani, jarrohlik yo‘li bilan qilingan operatsiyadan so‘ng 4 oyda 35 kg ozgani va hozir o‘zini juda yaxshi his qilayotgani, ko‘pchilik uning maslahati bilan shu operatsiyani qildirgani haqida gapirdi.
Shahnoza Otaboyeva vazni sabab 5 yil sahnaga chiqmagani haqida
“Bu ishni hamma bildi, chunki men hech kimdan berkitib qilmadim. Birinchi navbatda yaxshi shifokor tanlay olish kerak ekan, sababi bu sizning hayotingiz bilan bog‘liq. Ko‘pchilik bilan maslahatlashdim. Ayol kishi farzand ko‘rgandan keyin baribir semiradi. Ayniqsa, COVID-19 dan keyin ko‘p o‘zgarishlar bo‘ldi, yashash uchun kurashdik. Yaqinda Ozarbayjondan kelgan shifokorga bordim va jarrohlik yo‘li bilan ozish uchun operatsiya qildirdim. Shifokorga borganimda vaznim 113 kg edi, operatsiya qildirganimdan keyin 4 oyda 80 kg bo‘ldim. O‘zimni juda yaxshi his qilyapman, chunki 5 yil sahnadan qochib yurgandim. Vaznim sababli klip ololmadim, sahnaga chiqolmadim. Ozish uchun hamma narsa qildim, foydasi bo‘lmadi”, — deydi xonanda.
Jarrohlik operatsiyasidan oldingi holati va undan keyin 35 kg vazn yo‘qotgani haqida
“Operatsiya qildirish haqida ko‘p ayollarga aytyapman. San’atkor bo‘lganingizdan keyin shu holat bo‘lsa, ko‘pchilikdan qochar ekansiz, odamlardan uyalarkansiz. Do‘konga kirishim bilan sizga mos o‘lchamdagi kiyim yo‘q deyishlari ko‘nglimga tegardi. Biror narsa tiktirsangiz, yarashmaydi, oynaga qaragingiz kelmaydi, bu to‘la vaznli ayollarimizda oddiy hol. Shunaqa voqealar bo‘lgan. Juda qiynaldim, stress bo‘ldi, bu holatni boshdan kechirgan odam biladi. Men 35 kg vazn tashladim, yaqinda borib shifokor ko‘rigidan o‘tgandim. Hozir o‘zimni juda yengil his qilyapman, xuddi 15 yil oldingi, klipimdagi styuardessa ko‘rinishida bo‘lgan Shahnozaga qaytgandekman. Bu reklama emas, o‘zim boshdan kechirganim uchun buni ko‘pchilikka tavsiya qildim. Ko‘pchilik Instagram sahifamda 5-6 oydan beri meni kuzatib keladi, ayrimlari xuddi shu jarrohlik operatsiyasini qildirdi va menga rahmat aytdi” , — deydi Shahnoza Otaboyeva intervyusida.
“Ko‘pchilik noto‘g‘ri ma’lumot bergan, hamma qatori ovqat yeymiz. Biroq 1-2 oy dieta qilish kerak, sababi operatsiya joylari bitishi kerak. Shundan keyin hamma narsa yeyish mumkin, lekin ozgina yesangiz ham, to‘yib qolasiz. To‘g‘ri ovqatlanishda ham kam, biroq tez-tez, ya’ni 5-6 mahal taom iste’mol qilinadi. Men ham aynan shunga amal qilaman, ozgina yeb to‘yib qolaman. Avval 2 kosa ovqat yesam ham, to‘ymasdim, hozir 2-3 qoshiqqa to‘yib qolaman. Asosiysi, ijodga qaytdim, sog‘lomman, hayotdan zavqlanib yashayapman. Oldin menga kiyim topish muammo edi, hozir kiyim tanlayapman. Bu ayol kishi uchun baxt” , — deydi xonanda.
Ma’lumot uchun, Shahnoza Otaboyeva yanvar oyida ozarbayjonlik shifokor Habil Qafarovga ozish uchun jarrohlik operatsiyasini qildirgan edi. U operatsiyadan keyin Instagram sahifasidagi obunachilariga ahvoli yaxshi ekanini, o‘zini yengil his qilgani, umuman og‘riqlarsiz operatsiyani boshdan kechirganini aytgan.
“Assalomu alaykum, aziz obunachilarim. Men o‘zimga keldim, ahvolim yaxshi. Shifokorning qo‘li yengil ekan, umuman og‘riqni his qilmadim. Ozgina oshqozonim og‘riyapti, lekin bu katta muammo emas” , — degan edi Shahnoza Otaboyeva.
Mavzuga doir: 40 kilodan 60 kilogacha. Oshqozon kichraytirish operatsiyasi orqali ozayotgan o‘zbekistonlik mashhurlar (foto, video)
Izoh (0)