Rossiyadan O‘zbekiston va boshqa MDH mamlakatlariga pul o‘tkazmalari may oyida tarixiy maksimal darajaga yetgan. Bu haqda “Kommersant” xabar bermoqda.
Markaziy Osiyo mamlakatlariga pul o‘tkazmalarining o‘sishi rossiyaliklarning xalqaro kartalarni ochishi bilan bog‘liq bo‘lsa, Kavkaz mamlakatlariga asosan migratsiya hisobiga sodir bo‘ldi.
Ko‘p MDH davlatlarining markaziy banklari aprel—may oylarida Rossiyadan pul o‘tkazmalari hajmining o‘sishini qayd etmoqda.
Yilning birinchi yarmida Rossiyadan O‘zbekistonga rubldagi o‘tkazmalar qariyb 200 mln dollarni tashkil etdi.
Markaziy bank raisi Mamarizo Nurmurodovga ko‘ra, 1-iyulda Rossiya fuqarolarining O‘zbekiston banklaridagi hisobvaraqlarida 115 million dollar bo‘lgan.
Bundan tashqari, ikkinchi chorakda chet elliklarning mahalliy banklardagi hisobvaraqlari soni 38,5 foizga oshib, 169 mingtaga yetdi. Shu jumladan, Visa va Mastercard valyuta kartalarida ochilgan hisoblar 90 mingta.
May oyida Armaniston tarixida mutlaq rekord o‘rnatildi — Rossiyadan 266 mln dollar pul o‘tkazildi, mart oyida bu ko‘rsatkich 115 mln dollar edi.
Gruziya ham tarixiy rekord o‘rnatdi — Rossiyadan o‘tkazilgan transferlar miqdori mart oyidagi 27 mln dollardan may oyida 313 mln dollarga (62 foiz) oshdi. Iyun oyida ko‘rsatkich biroz qisqardi — 231 mln dollargacha (54 foiz).
Qozog‘istonda mart oyida Rossiyadan o‘tkazilgan pul o‘tkazmalari bor-yo‘g‘i 9,5 mln dollarni tashkil qilgan bo‘lsa, may oyida u 94,6 mln dollarga oshgan.
Qirg‘izistonga o‘tkazmalar mart oyidagi 139,6 mln dollardan may oyida 245,6 mln dollarga oshgan.
Bu tendensiya migratsiya jarayonlari, rossiyaliklar pullarini Armaniston va Gruziyaga ko‘chirishi shuningdek, mablag‘larni O‘zbekiston, Qozog‘iston va Qirg‘iziston orqali xavfsizroq yurisdiksiyalarga ko‘chirmasdan olib chiqib ketish bilan bog‘liq, — deydi Rossiya Moliyaviy innovatsiyalar assotsiatsiyasi boshqaruvi rahbari Roman Proxorov.
Ko‘pgina rossiyaliklar shaxsan yoki vositachilar orqali qo‘shni mamlakatlardagi banklarda xalqaro to‘lov tizimlarining hisob raqamlari va kartalarini ochdi.
Iyun oyida o‘tkazmalar hajmining o‘sishi sekinlasha boshladi.
Bahorda vahima va hayajon bor edi, endi hamma tinchlandi. Chet elga pul o‘tkazmoqchi bo‘lganlar buni amalga oshirib bo‘ldi, endi qo‘shni davlatlarga pul o‘tkazmalari an’anaviy hajmda amalga oshiriladi, — dedi Milliy to‘lov kengashi rahbari Alma Obayeva.
Avvalroq O‘zbekistonga iyun oyida 1,34 mlrd dollar pul o‘tkazilgani haqida xabar berilgandi.
Izoh (0)