Ўзбекистон ва бошқа МДҲ давлатларига Россиядан пул ўтказмалари миқдори рекорд даражага етди

Россиядан Ўзбекистон ва бошқа МДҲ мамлакатларига пул ўтказмалари май ойида тарихий максимал даражага етган. Бу ҳақда «Коммерсантъ» хабар бермоқда.

Марказий Осиё мамлакатларига пул ўтказмаларининг ўсиши россияликларнинг халқаро карталарни очиши билан боғлиқ бўлса, Кавказ мамлакатларига асосан миграция ҳисобига содир бўлди.

Кўп МДҲ давлатларининг марказий банклари апрель—май ойларида Россиядан пул ўтказмалари ҳажмининг ўсишини қайд этмоқда.

Йилнинг биринчи ярмида Россиядан Ўзбекистонга рублдаги ўтказмалар қарийб 200 млн долларни ташкил этди.

Марказий банк раиси Мамаризо Нурмуродовга кўра, 1 июлда Россия фуқароларининг Ўзбекистон банкларидаги ҳисобварақларида 115 миллион доллар бўлган.

Бундан ташқари, иккинчи чоракда чет элликларнинг маҳаллий банклардаги ҳисобварақлари сони 38,5 фоизга ошиб, 169 мингтага етди. Шу жумладан, Visa ва Mastercard валюта карталарида очилган ҳисоблар 90 мингта.

Май ойида Арманистон тарихида мутлақ рекорд ўрнатилди — Россиядан 266 млн доллар пул ўтказилди, март ойида бу кўрсаткич 115 млн доллар эди.

Грузия ҳам тарихий рекорд ўрнатди — Россиядан ўтказилган трансферлар миқдори март ойидаги 27 млн доллардан май ойида 313 млн долларга (62 фоиз) ошди. Июнь ойида кўрсаткич бироз қисқарди — 231 млн долларгача (54 фоиз).

Қозоғистонда март ойида Россиядан ўтказилган пул ўтказмалари бор-йўғи 9,5 млн долларни ташкил қилган бўлса, май ойида у 94,6 млн долларга ошган.

Қирғизистонга ўтказмалар март ойидаги 139,6 млн доллардан май ойида 245,6 млн долларга ошган.

Бу тенденция миграция жараёнлари, россияликлар пулларини Арманистон ва Грузияга кўчириши шунингдек, маблағларни Ўзбекистон, Қозоғистон ва Қирғизистон орқали хавфсизроқ юрисдиксияларга кўчирмасдан олиб чиқиб кетиш билан боғлиқ, — дейди Россия Молиявий инновациялар ассоциацияси бошқаруви раҳбари Роман Прохоров.

Кўпгина россияликлар шахсан ёки воситачилар орқали қўшни мамлакатлардаги банкларда халқаро тўлов тизимларининг ҳисоб рақамлари ва карталарини очди.

Июнь ойида ўтказмалар ҳажмининг ўсиши секинлаша бошлади.

Баҳорда ваҳима ва ҳаяжон бор эди, энди ҳамма тинчланди. Чет элга пул ўтказмоқчи бўлганлар буни амалга ошириб бўлди, энди қўшни давлатларга пул ўтказмалари анъанавий ҳажмда амалга оширилади, — деди Миллий тўлов кенгаши раҳбари Алма Обаева.

Аввалроқ Ўзбекистонга июнь ойида 1,34 млрд доллар пул ўтказилгани ҳақида хабар берилганди.