Britaniya bosh vaziri uchun nomzod Rishi Sunak Xitoyning mamlakatdagi ta’sirini cheklashga va’da berdi

Buyuk Britaniya sobiq moliya vaziri Rishi Sunak mamlakat bosh vaziri etib saylansa, Xitoyning Buyuk Britaniyadagi ta’sirini cheklashni rejalashtirmoqda. Daily Telegraph gazetasida chop etilgan siyosiy bayonotda u Britaniyada faoliyat yuritayotgan barcha Konfutsiy institutlarini yopishga va Xitoyga bosimni kuchaytirishga va’da berdi.

“Xitoy — Buyuk Britaniya uchun, dunyoning iqtisodiy va milliy xavfsizligi uchun eng katta va uzoq muddatli tahdiddir, buni MI5 Britaniya kontrrazvedkasi bosh direktori (Ken Makkallum) va FQB direktori (Kristofer Rey) ham ta’kidlagan. Uyimizda Xitoy fuqarolari texnologiyalarni o‘g‘irlamoqda va universitetlarimizga kirib bormoqda, xorijda esa ular Rossiyadan neft sotib olish orqali Rossiya prezidenti Vladimir Putinga Ukrainaga bostirib kirishda yordam bermoqda, shuningdek, qo‘shnilarini, jumladan, Tayvanni qo‘rqitishga harakat qilmoqda”, — deb ta’kidladi bosh vazir lavozimiga nomzod.

Sunak Xitoyning “Britaniya universitetlarini egallab olishiga” yo‘l qo‘ymaslikka, xitoylik xakerlarga faol qarshi turishga hamda Britaniya kontrrazvedkasiga biznes va davlat idoralariga o‘zlarini Xitoy tahdididan himoyalashda yordam berishni buyurishga va’da berdi. U, shuningdek, AQSH prezidenti Jo Bayden va qirollikning boshqa hamkor davlatlari rahbarlari bilan birgalikda G‘arbning Xitoyga nisbatan zaifligini minimallashtirishga harakat qilishini aytdi.

Avvalroq Sunak Buyuk Britaniyada favqulodda holat e’lon qilgan edi. Uning tushuntirishicha, britaniyalik oilalar inflyatsiya ortib borayotgani tufayli katta xarajatlarga duchor bo‘lmoqda, Milliy sog‘liqni saqlash xizmati qulashi mumkin, jamoatchilik esa hukumat noqonuniy muhojirlar tufayli chegaralar nazoratini yo‘qotganini da’vo qilmoqda.

Buyuk Britaniyaning amaldagi bosh vaziri Boris Jonson 7-iyul kuni iste’foga chiqishini e’lon qilgan edi. Buyuk Britaniya parlamentida Konservativ partiyaning ovoz berish natijalariga ko‘ra, partiya yetakchisi va bosh vazir lavozimlariga ikki asosiy da’vogar aniqlandi – sobiq moliya vaziri Rishi Sunak va tashqi ishlar vaziri Liz Trass. Partiyaning 200 ming a’zosi ovoz berish jarayonida yangi hukumatni kim boshqarishini hal qiladi. Natijalar 5-sentabr kuni e’lon qilinadi.

Rishi Sunak ham, uning raqibi ham Jonson hukumati a’zolari bo‘lgan. Ular Ukrainadagi urushni qoralaydi va Moskvaga qarshi sanksiyalar qo‘llash tarafdori.