Myanmada to‘rt nafar muxolifatchi terrorchilikda ayblanib qatl etildi, deb xabar bermoqda Reuters. Bu mamlakatda so‘nggi o‘n yilliklardagi birinchi qatl. Hukm qay tarzda ijro etilgani noma’lum, ilgari Myanmada oliy jazo osish yo‘li bilan amalga oshirilar edi.
Qatl etilganlar orasida 53 yoshli yozuvchi Ko Jimmi va Myanmaning birinchi reperi Pyo Zeya To ham bor, deb yozgan muxolifatchi “Iravadi” nashri Twitter’da.
Birlashgan Millatlar Tashkilotining Myanmadagi Inson huquqlari bo‘yicha maxsus ma’ruzachisi Tom Endryus “myanmalik vatanparvarlar hamda inson huquqlari va demokratiya himoyachilari”ning qatl etilishidan g‘azablangani va qayg‘uga tushganini aytdi.
“Bu axloqsiz harakatlar xalqaro hamjamiyat uchun burilish lahzasi bo‘lishi kerak”, — deya qo‘shimcha qildi u.
2021-yilning 1-fevralida Myanmada hokimiyat harbiylar qo‘liga o‘tgandi. O‘sha kuni mamlakat parlamenti ish boshlashi, ya’ni hukumatning yangi tarkibini tasdiqlashi kerak edi. Armiya o‘zining siyosiy vaziyatga aralashuvini parlament saylovlari paytida saylovchilar ro‘yxatining soxtalashtirilgani va shu sababli boshlangan tartibsizliklar bilan izohladi.
Myanma prezidenti Vin Min, davlat maslahatchisi Aun San Su Chji va hukmron “Demokratiya uchun milliy liga” partiyasining boshqa yetakchilari hibsga olingan. Qurolli kuchlar qo‘mondoni, katta general Min Aung Xlayn muvaqqat prezident bo‘ldi. Mamlakat bo‘ylab norozilik namoyishlari boshlandi, ularni bostirish oqibatida yuzlab o‘limlar qayd etildi.
Mamlakatda ayni paytda favqulodda vaziyat amal qilmoqda. 2021-yilning 5-martida Qo‘shma Shtatlar Myanma Ichki ishlar vazirligi va Mudofaa vazirligiga qarshi sanksiyalar kiritdi.
Izoh (0)