Буюк Британия собиқ молия вазири Риши Сунак мамлакат бош вазири этиб сайланса, Хитойнинг Буюк Британиядаги таъсирини чеклашни режалаштирмоқда. Daily Telegraph газетасида чоп этилган сиёсий баёнотда у Британияда фаолият юритаётган барча Конфуций институтларини ёпишга ва Хитойга босимни кучайтиришга ваъда берди.
Конфуций институтлари — хитой тили ва маданиятини ўрганиш бўйича Хитой Халқ Республикаси Таълим вазирлиги томонидан хорижий таълим муассасалари билан ҳамкорликда қўллаб-қувватланадиган муассасалардир. Ҳозирда Буюк Британияда 31 та бундай муассаса мавжуд — бу дунёнинг бошқа мамлакатларидаги Конфуций институтларидан кўп.
Сунак Хитойнинг «Британия университетларини эгаллаб олишига» йўл қўймасликка, хитойлик хакерларга фаол қарши туришга ҳамда Британия контрразведкасига бизнес ва давлат идораларига ўзларини Хитой таҳдидидан ҳимоялашда ёрдам беришни буюришга ваъда берди. У, шунингдек, АҚШ президенти Жо Байден ва қиролликнинг бошқа ҳамкор давлатлари раҳбарлари билан биргаликда Ғарбнинг Хитойга нисбатан заифлигини минималлаштиришга ҳаракат қилишини айтди.
Аввалроқ Сунак Буюк Британияда фавқулодда ҳолат эълон қилган эди. Унинг тушунтиришича, британиялик оилалар инфляция ортиб бораётгани туфайли катта харажатларга дучор бўлмоқда, Миллий соғлиқни сақлаш хизмати қулаши мумкин, жамоатчилик эса ҳукумат ноқонуний муҳожирлар туфайли чегаралар назоратини йўқотганини даъво қилмоқда.
Буюк Британиянинг амалдаги бош вазири Борис Жонсон 7 июль куни истеъфога чиқишини эълон қилган эди. Буюк Британия парламентида Консерватив партиянинг овоз бериш натижаларига кўра, партия етакчиси ва бош вазир лавозимларига икки асосий даъвогар аниқланди – собиқ молия вазири Риши Сунак ва ташқи ишлар вазири Лиз Трасс. Партиянинг 200 минг аъзоси овоз бериш жараёнида янги ҳукуматни ким бошқаришини ҳал қилади. Натижалар 5 сентябрь куни эълон қилинади.
Риши Сунак ҳам, унинг рақиби ҳам Жонсон ҳукумати аъзолари бўлган. Улар Украинадаги урушни қоралайди ва Москвага қарши санкциялар қўллаш тарафдори.
Изоҳ (0)