Yevropa Ittifoqi kengashi Rossiya oltinining o‘z hududiga olib kirilishini taqiqlashga qaror qildi. Bu haqda Yevropa Ittifoqining tashqi ishlar va xavfsizlik siyosati bo‘yicha oliy vakili Xosep Borrellga tayanib, “Vedemosti” ma’lum qildi.
“Biz Rossiyaning energiyadan keyingi eng muhim eksportini amalda taqiqlayapmiz”, — dedi Borrell.
Taqiq Rossiyadan qazib olingan, Yevropa yoki uchinchi davlatlarga eksport qilingan oltinni to‘g‘ridan to‘g‘ri yoki bilvosita sotib olish, import qilish va o‘tkazishga taalluqlidir.
Embargo zargarlik buyumlariga ham tegishli.
Shuningdek, 21-iyul kuni Buyuk Britaniya Rossiya oltinini import qilishni taqiqladi. Bu haqda Britaniya hukumati saytida chop etilgan bayonotda aytildi.
Avvalroq AQSH (28-iyun), Yaponiya (5-iyul) va Kanada (8-iyul) Rossiya oltinining importiga taqiq joriy qilgan edi.
G7 guruhiga kiruvchi qator davlatlarning Rossiyadan oltinga embargo joriy etish rejalari iyun oxirida ma’lum bo‘ldi.
Rossiya Oltin ishlab chiqaruvchilar ittifoqining ma’lumotlariga ko‘ra, 2021-yilda mamlakatda oltin qazib olish 0,2 foizga kamayib, 330,9 tonnani tashkil etgan.
Oltinning umumiy ishlab chiqarilishi 363,5 tonnani (-0,1 foiz) tashkil etdi.
Rossiya Moliya vazirligi ma’lumotlariga ko‘ra, 2021-yilda Rossiyada 346,4 tonna oltin ishlab chiqarilgan, bu 2020-yilga nisbatan 1,8 foizga ko‘pdir.
Rossiyadan oltin eksporti 2021-yilda 5,6 foizga kamayib, 302,2 tonnani tashkil etdi, pul ko‘rinishida yetkazib berish 17,4 milliard dollar (-5,9 foiz) bo‘lgan ya’ni xorijga yetkazib berish mamlakatda ishlab chiqarilgan oltinning 83-87 foizini tashkil etgan.
2021-yilda Rossiya oltinining eng yirik xaridori Buyuk Britaniya bo‘lib, u 266,1 tonna 15,4 milliard dollarga sotib olgan. Bu umumiy eksportning 88 foizini tashkil etgan.
Avvalroq O‘zbekiston nega uch oydan beri oltin sotmayotgani haqida xabar berilgan edi.
Izoh (0)