Европа Иттифоқи кенгаши Россия олтинининг ўз ҳудудига олиб кирилишини тақиқлашга қарор қилди. Бу ҳақда Европа Иттифоқининг ташқи ишлар ва хавфсизлик сиёсати бўйича олий вакили Хосеп Борреллга таяниб, «Ведемости» маълум қилди.
«Биз Россиянинг энергиядан кейинги энг муҳим экспортини амалда тақиқлаяпмиз», — деди Боррелл.
Тақиқ Россиядан қазиб олинган, Европа ёки учинчи давлатларга экспорт қилинган олтинни тўғридан-тўғри ёки билвосита сотиб олиш, импорт қилиш ва ўтказишга тааллуқлидир.
Эмбарго заргарлик буюмларига ҳам тегишли.
Шунингдек, 21 июль куни Буюк Британия Россия олтинини импорт қилишни тақиқлади. Бу ҳақда Британия ҳукумати сайтида чоп этилган баёнотда айтилди.
Аввалроқ АҚШ (28 июнь), Япония (5 июль) ва Канада (8 июль) Россия олтинининг импортига тақиқ жорий қилган эди.
G7 гуруҳига кирувчи қатор давлатларнинг Россиядан олтинга эмбарго жорий этиш режалари июнь охирида маълум бўлди.
Россия Олтин ишлаб чиқарувчилар иттифоқининг маълумотларига кўра, 2021 йилда мамлакатда олтин қазиб олиш 0,2 фоизга камайиб, 330,9 тоннани ташкил этган.
Олтиннинг умумий ишлаб чиқарилиши 363,5 тоннани (-0,1 фоиз) ташкил этди.
Россия Молия вазирлиги маълумотларига кўра, 2021 йилда Россияда 346,4 тонна олтин ишлаб чиқарилган, бу 2020 йилга нисбатан 1,8 фоизга кўпдир.
Россиядан олтин экспорти 2021 йилда 5,6 фоизга камайиб, 302,2 тоннани ташкил этди, пул кўринишида етказиб бериш 17,4 миллиард доллар (-5,9 фоиз) бўлган яъни хорижга етказиб бериш мамлакатда ишлаб чиқарилган олтиннинг 83-87 фоизини ташкил этган.
2021 йилда Россия олтинининг энг йирик харидори Буюк Британия бўлиб, у 266,1 тонна 15,4 миллиард долларга сотиб олган. Бу умумий экспортнинг 88 фоизини ташкил этган.
Аввалроқ Ўзбекистон нега уч ойдан бери олтин сотмаётгани ҳақида хабар берилган эди.
Изоҳ (0)