O‘zbekisonning 2022-yil yanvar—iyun oylaridagi tashqi savdo aylanmasi ma’lum bo‘ldi. Bu haqda Davlat statistika qo‘mitasi xabar bermoqda.
Joriy yilning dastlabki 5 oyida tashqi savdo aylanmasi 24,5 mlrd dollarni tashkil qilgan. O‘tgan yilning shu davriga nisbatan bu ko‘rsatkich 6 mlrd dollarga ko‘proqdir.
Yanvar—iyun oylariga ko‘ra eksport 9,9 mlrd dollar bo‘lgan bo‘lsa, import 14,6 mlrd dollarga yetgan. 2021-yilning ilik 5 oyida bu ko‘rsatkichlar mos ravishda 7 mlrd dollar va 11,4 mlrd dollar edi.
O‘zbekiston 6 oy ichida qariyb 3 mlrd dollarlik oltin sotgan. O‘tgan yilning shu davrida 1,4 mlrd dollarlik oltin sotilgan edi. Oradagi farq 2,1 borabarga ko‘paygan.
O‘zbekistonning Yevrosiyo iqtisodiy ittifoqiga a’zo davlatlar bilan tashqi savdo aylanmasi 7 mlrd dollarni tashkil etdi.
Oltinning ko‘p sotilayotgani hisobiga O‘zbekiston eksporti o‘tgan yilning shu davriga nisbatan 45,5 foizga o‘sgan.
2022-yilning yanvar—iyun oylarida 4,6 mlrd dollarlik passiv tashqi savdo balansi kuzatildi.
O‘zbekiston eng ko‘p savdo qilayotgan 10 ta davlatdan 7 tasiga kamroq sotib, ulardan ko‘proq sotib olmoqda.
O‘zbekiston dunyoning 183 mamlakati bilan savdo aloqalarini amalga oshirib kelmoqda.
Tashqi savdo aylanmasining nisbatan salmoqli hissasi Xitoy (18,5 foiz), Rossiya (16,6 foiz), Qozog‘iston (8,6 foiz), Turkiyada (7,1 foiz), Koreya (5,3 foiz), Germaniya (2,4 foiz) va Qirg‘iz Respublikasida (2,3 foiz) qayd etilgan.
O‘zbekiston kimga nima sotdi
Joriy yilning yanvar—iyun oylarida mamlakatning eksportyorlari soni 5 237 tani tashkil etib, ular tomonidan oltindan tashqari 7 mlrd dollarlik tovar va xizmatlar eksport qilinishi ta’minlandi.Eksport tarkibida tovarlar ulushi 83,7 foizni tashkil etib, ular sanoat tovarlari (24 foiz), oziq-ovqat mahsulotlari va tirik hayvonlar (6,6 foiz), kimyoviy vositalar va shunga o‘xshash mahsulotlar (5,8 foiz) hissasiga to‘g‘ri kelmoqda.
Miqdorlar haqida gapiradigan bo‘lsak, oltin 2,97 mlrd dollarga, sanoat tovarlari 2,4 mlrd dollarga, xizmatlar esa 1,6 mlrd dollarga sotilgan.
Yarim yilda xomashyo va yoqilg‘idan tashqari nooziq-ovqat mahsulotlari savdosi o‘tgan yilning shu davriga nisbatan kamaydi.
12,6 foiz ulush bilan Xitoy asosiy xaridor bo‘lgan. Ikkinchi o‘rinda Rossiya (12,3 foiz), uchinchi o‘rinda Turkiya (9,2 foiz).
Toshkent shahri, Toshkent va Andijon viloyatlari xorijga eng ko‘p mahsulot sotgan. Eng kam sotganlar — Surxondaryo, Xorazm va Jizzax viloyatlari.
O‘zbekiston kimdan nima sotib oldi
Birinchi o‘rinda avvalgi yillardagi kabi sanoatni rivojlantirish uchun mashina va uskunalar (33,9 foiz).Ikkinchi o‘rinda sanoat mahsulotlari (18,9 foiz), uchinchi o‘rinda kimyoviy vositalar va shunga o‘xshash mahsulotlar (13,7 foiz).
O‘zbekiston eng ko‘p Xitoy (22,5 foiz), Rossiya (19,5 foiz) va Qozog‘istondan (10,2 foiz) xarid qilgan.
Hududlar bo‘yicha eng ko‘p import qilingan mahsulotlar Toshkent shahri, Toshkent va Andijon viloyatlariga to‘g‘ri keladi. Eng kami — Qashqadaryo, Qoraqalpog‘iston hamda Surxondaryo viloyatiga.