Rossiya hukumati 2023-yil boshida Ukrainaga qarshi yangi yirik hujumni boshlashi, shu tariqa Odessa va mamlakatning janubi-g‘arbiy sohillarini egallab olishga va Ukrainani Qora dengizdan uzib qo‘yishga harakat qilishi mumkin, deb yozadi Amerikaning Foreign Policy jurnal. Rossiyaning yangi harbiy maqsadlari haqida nashrga Amerika va Yevropaning amaldagi va sobiq to‘rt nafar rasmiysi ma’lum qilgan.
“Kelgusi yili ular (ukrainaliklar) Rossiyaning yana bir jiddiy hujumiga duch kelishi mumkinligi taxmin qilinmoqda.Va biz ularga nafaqat qurollar, balki odamlarni — yangi odamlar, yaxshi tayyorgarlikdan o‘tgan odamlarni ham berish uchun qo‘limizdan kelganini qilishimiz kerak”, - dedi ismini oshkor qilmaslik sharti bilan gapirgan G‘arb rasmiysi.
AQSH va Yevropa Ittifoqi rasmiylarining fikricha, Kreml Odessani “urushning keyingi bosqichida asosiy strategik yutuq” sifatida ko‘radi.
20-iyul kuni Rossiya tashqi ishlar vaziri Sergey Lavrov Rossiyaning Ukrainaga qarshi “maxsus harbiy operatsiyasi geografiyasi” o‘zgarganini aytdi. Uning so‘zlariga ko‘ra, bu nafaqat LXR va DXR, balki “Xerson viloyati, Zaporojye viloyati va boshqa bir qator hududlarni ham o‘z ichiga oladi”.
Izoh (0)