Ўзбекистонга Испаниядан яна 4 та тезюрар электропоезд олиб келиниши мумкин

Мадрид шаҳридаги Испания Саноат, савдо ва туризм вазирлигида Ўзбекистон элчихонаси кўмагида «Ўзбекистон темир йўллари» делегациясининг учрашуви ташкил этилди, деб хабар бермоқда Дунё ахборот агентлиги.

Қайд этилишича, учрашувдан мақсад «FIEМ» корхоналарни интернационализация қилиш жамғармасидан 4 та «Талго-250» тезюрар электропоездини харид қилиш учун имтиёзли кредитлар ажратиш масаласини муҳокама қилишдан иборат бўлган.

Элчихона маълумотига кўра, музокараларда «Ўзбекистон темир йўллари» АЖ тезюрар йўловчи поездларини ташкил этиш ва улардан фойдаланиш бошқармаси бошлиғи Шерзод Тўлаганов ҳамда халқаро ҳамкорлик ва ташқи иқтисодий алоқалар бўлими мутахассиси Аъзамхон Мелибоев қатнашган. Испания томонидан эса Саноат, савдо ва туризм вазирлигининг Осиё, ЕИга аъзо бўлмаган Европа мамлакатлари ва Океания департаменти директори ўринбосари Вероника Сампер, «FIEМ» жамғармасининг масъул ходимлари иштирок этган.

Учрашувда Испания вакилларига акциядорлик жамияти фаолияти ва Ўзбекистонда темир йўл қурилиши соҳасида амалга оширилаётган лойиҳалар тақдим этилган. Хусусан, шу кунгача Испаниянинг Patentes Talgo S.L.U. компаниясида ишлаб чиқарилган 6 та тезюрар электропоезд «Ўзбекистон темир йўллари» томонидан харид қилингани таъкидланган. Охирги партия 2021 йилда олиб келинган. Лойиҳаларни молиялаштириш учун Корхоналарни интернационализация қилиш жамғармасидан 30 йил муддатга 10 йиллик имтиёзли давр билан кредит жалб этилган.

Шунингдек, Испания томонига Бухоро—Урганч—Хива темир йўл линиясини электрлаштириш лойиҳасининг амалга оширилиши ҳақида батафсил маълумот берилган. Мазкур тезюрар линия фойдаланишга топширилгандан сўнг қўшимча 4 та электропоезд сотиб олиш назарда тутилмоқда. Томонлар лойиҳани молиялаштириш учун жамғарманинг имтиёзли кредити ҳисобидан «Талго-250» поездларини харид қилишни ташкил этиш имкониятларини муҳокама қилган.

Испания томони Марказий Осиё мамлакатлари орасида юқори тезликдаги электрлаштирилган темир йўл алоқасини жорий этишда етакчи бўлган Ўзбекистон билан бу борадаги ҳамкорликни давом эттириш муҳимлигини таъкидлаган. Испания ҳукуматининг тегишли вазирликлари раҳбарияти томонидан ушбу масалани кўриб чиқишда «FIEМ» жамғармасидан имтиёзли шартларда кредит ажратиш имконияти масаласини ижобий ҳал этиш учун барча саъй-ҳаракатлар амалга ошириши маълум қилинган.

Музокара якунлари бўйича томонлар ушбу масала бўйича экспертлар даражасида ишлашни давом эттиришга келишиб олган.

Маълумот учун, 2019 йилнинг июнь ойида «Ўзбекистон темир йўллари» АЖ Испаниянинг Patentes Talgo S.L.U. компанияси билан Талго-250 серияли иккита тезюрар электропоезд сотиб олиш учун шартнома имзоланган. Келишувларга кўра, 2021 йил октябрь ойигача «Ўзбекистон темир йўллари» АЖ локомотив паркини иккита тезюрар «Афросиёб» электропоезди билан тўлдириш керак эди. Испаниянинг Patentes Talgo S.L.U. компанияси ўз мажбуриятларини тўлиқ ва ўз вақтида бажарган. 1 октябрь куни Тошкент марказий темир йўл вокзалида «Афросиёб» поездининг сўнгги таркибининг келиши тантанали равишда кутиб олинган эди.