Namanganda transport vositalari harakatiga xalaqit bergan to‘y korteji avtomobillari vaqtinchalik jarima maydoniga joylashtirildi. Bu haqda “Daryo” muxbiri Azizbek Abduvaliyev xabar bermoqda.
Hodisa joriy yil 17-iyul kuni ro‘y bergan. Shu kuni kechki payt Namangan shahridagi Lola—Davlatobod yo‘nalishida Lexus, Mercedes-Benz, Lacetti va Lacetti Gentra avtomobillaridan iborat to‘y korteji ikki qator bo‘lib harakatlanib, boshqa transport vositalari uchun yo‘lni to‘sib qo‘ygan.
Ruxsat etilmagan “migalka” o‘rnatib olgan avtomobillardan biri esa hatto qarama-qarshi yo‘nalishda harakatlangani ham qayd etilgan.
Ajablanarli tomoni, ushbu to‘y korteji tarkibida dori-darmon savdosi bilan shug‘ullanuvchi MChJlardan birining Damas mashinasi ham bo‘lgan.
Ushbu kortej xatti-harakatlari aks etgan video ijtimoiy tarmoqlarda tarqalib, voqea muhokamalarga sabab bo‘ldi. Namangan viloyat IIB xodimlari tomonidan qidiruv-surishtiruv ishlari olib borilib, haydovchilarning shaxsiga aniqlik kiritildi.
“Ularga nisbatan ma’muriy bayonnomalar rasmiylashtirilib, transport vositalari vaqtinchalik jarima maydoniga joylashtirildi. Ruxsat etilmagan ‘migalka’ o‘rnatib olib, qarama-qarshi yo‘nalishda harakatlangan avtomobil haydovchisiga esa qonunlarda belgilangan jazo qo‘llanildi”, — deyiladi viloyat IIB matbuot xizmati xabarida.
Mavzuga doir:
- Samarqandda harakatlanayotgan “Jiguli” yukxonasiga Malibu’ni videoga olish uchun tasvirchini joylashtirgan haydovchi jarimaga tortildi
- Surxondaryoda guruh-guruh bo‘lib harakatlangan haydovchilarga chora ko‘rildi (video)
- Qoraqalpog‘istonda to‘y saylida guruh bo‘lib harakat qilgan 9 ta avtomobil jarima maydonchasiga joylashtirildi
Izoh (0)