Наманганда транспорт воситалари ҳаракатига халақит берган тўй кортежи автомобиллари вақтинчалик жарима майдонига жойлаштирилди. Бу ҳақда «Дарё» мухбири Азизбек Абдувалиев хабар бермоқда.
Ҳодиса жорий йил 17 июль куни рўй берган. Шу куни кечки пайт Наманган шаҳридаги Лола—Давлатобод йўналишида Lexus, Mercedes-Benz, Lacetti ва Lacetti Gentra автомобилларидан иборат тўй кортежи икки қатор бўлиб ҳаракатланиб, бошқа транспорт воситалари учун йўлни тўсиб қўйган.
Рухсат этилмаган «мигалка» ўрнатиб олган автомобиллардан бири эса ҳатто қарама-қарши йўналишда ҳаракатлангани ҳам қайд этилган.
Ажабланарли томони, ушбу тўй кортежи таркибида дори-дармон савдоси билан шуғулланувчи МЧЖлардан бирининг Damas машинаси ҳам бўлган.
Ушбу кортеж хатти-ҳаракатлари акс этган видео ижтимоий тармоқларда тарқалиб, воқеа муҳокамаларга сабаб бўлди. Наманган вилоят ИИБ ходимлари томонидан қидирув-суриштирув ишлари олиб борилиб, ҳайдовчиларнинг шахсига аниқлик киритилди.
«Уларга нисбатан маъмурий баённомалар расмийлаштирилиб, транспорт воситалари вақтинчалик жарима майдонига жойлаштирилди. Рухсат этилмаган ‘мигалка’ ўрнатиб олиб, қарама-қарши йўналишда ҳаракатланган автомобиль ҳайдовчисига эса қонунларда белгиланган жазо қўлланилди», — дейилади вилоят ИИБ матбуот хизмати хабарида.
Мавзуга доир:
- Самарқандда ҳаракатланаётган «Жигули» юкхонасига Malibu’ни видеога олиш учун тасвирчини жойлаштирган ҳайдовчи жаримага тортилди
- Сурхондарёда гуруҳ-гуруҳ бўлиб ҳаракатланган ҳайдовчиларга чора кўрилди (видео)
- Қорақалпоғистонда тўй сайлида гуруҳ бўлиб ҳаракат қилган 9 та автомобиль жарима майдончасига жойлаштирилди
Изоҳ (0)