Moliyaviy qiyinchiliklar davrini boshdan kechirayotgan “Barselona” televizion huquqlarining ma’lum qismini sotish orqali holatni yaxshilashga urinmoqda. Futbol mutaxassis Alisher Nikimbayev mazkur jarayon borasida o‘z fikrlarini bildirib o‘tdi.
Yodingizda bo‘lsa, “Barselona” jiddiy moliyaviy muammolarga duch kelgan va shu sabab Lionel Messi klubni tark etishga majbur bo‘lgandi.“Ko‘k-anorranglilar” Sixth Street kompaniyasiga La Liga o‘yinlari telehuquqining 15 foizini 25 yilga bergan. Ushbu kelishuv natijasida “Barselona” 320—330 dan 400 million yevrogacha daromad qiladi. Avvalroq kataloniyaliklar La Liga o‘yinlariga telehuquqining 10 foizini 207,5 million yevroga sotgandi.Muammolar hamon mavjud, biroq kataloniyaliklar transfer bozorida ancha faol bo‘lib, Robert Levandovski va Rafinyani jami narxi 100 million yevroga xarid qildi.
Bu qanday sodir bo‘ldi? “Barselona” birdaniga pulni qayerdan oldi?
Gap shundaki, “ko‘k-anorranglilar” Sixth Street kompaniyasiga televizion huquqlarining dastlab 10 foizini 207,5 million yevroga sotdi. Keyin esa 320 million evaziga yana 15 foizini sotgani ma’lum bo‘ldi.
Shunday qilib televizion huquqlardan tushadigan 25 yillik daromadning 25 foizi 527,5 million yevroga sotildi. Oddiy qilib tushuntiradigan bo‘lsak, “Barselona” keyingi 25 yil uchun har yili 21,1 million yevroga teng keladigan kredit oldi.
21,1 million yevro “Barselona” La Ligadan oladigan barcha telehuquqlarining atigi 25 foizini tashkil etishini hisobga olsak, kataloniyaliklar va Sixth Street huquqlarning umumiy to‘plamini har mavsum uchun 84,4 million yevroga baholagan.
Aslida huquqlar qancha turadi? 2020/21-yilgi mavsumda (o‘tgan mavsum uchun ma’lumotlar hali mavjud emas) “Barselona” La Liga TV huquqlaridan eng katta qismini — 165 million yevro olgan. Ya’ni, klub hozirda yarim milliard yevroga ega bo‘lish uchun kelajak huquqlarini yarim narxiga sotib yubordi.
Sixth Street’ga keladigan bo‘lsak, narx darajasi hozirgidek qoladigan taqdirda ham kompaniya ikki baravar foyda olishi kafolatlangan.
Ushbu kelishuv sport menejmenti solnomalaridan o‘rin oladi va barcha mumkin bo‘lgan biznes kurs va forumlarda muhokama qilinadi.
Boshqa tomondan “Barselona” telehuquqlarini sotishdan kafolatlangan daromadga ega bo‘lishi yaxshi. Ammo rahbariyat kelajakdagi vorislarini yarim milliard yevrodan mahrum qilmoqda.
Alisher Nikimbayev, futbol mutaxassisi
Sixth Street “San-Antonio” basketbol jamoasining 20% ulushiga egalik qiladi, shuningdek, “Real Madrid”ga 360 million dollar sarmoya kiritgan. Madrid klubi stadiondan tushgan daromadning 30 foizini kompaniya hisobiga o‘tkazadi.
Izoh (0)