Молиявий қийинчиликлар даврини бошдан кечираётган «Барселона» телевизион ҳуқуқларининг маълум қисмини сотиш орқали ҳолатни яхшилашга уринмоқда. Футбол мутахассис Алишер Никимбаев мазкур жараён борасида ўз фикрларини билдириб ўтди.
Ёдингизда бўлса, «Барселона» жиддий молиявий муаммоларга дуч келган ва шу сабаб Лионель Месси клубни тарк этишга мажбур бўлганди.«Кўк-анорранглилар» Sixth Street компаниясига Ла Лига ўйинлари телеҳуқуқининг 15 фоизини 25 йилга берган. Ушбу келишув натижасида «Барселона» 320—330 дан 400 миллион еврогача даромад қилади. Аввалроқ каталонияликлар Ла Лига ўйинларига телеҳуқуқининг 10 фоизини 207,5 миллион еврога сотганди.Муаммолар ҳамон мавжуд, бироқ каталонияликлар трансфер бозорида анча фаол бўлиб, Роберт Левандовски ва Рафиньяни жами нархи 100 миллион еврога харид қилди.
Бу қандай содир бўлди? «Барселона» бирданига пулни қаердан олди?
Гап шундаки, «кўк-анорранглилар» Sixth Street компаниясига телевизион ҳуқуқларининг дастлаб 10 фоизини 207,5 миллион еврога сотди. Кейин эса 320 миллион эвазига яна 15 фоизини сотгани маълум бўлди.
Шундай қилиб телевизион ҳуқуқлардан тушадиган 25 йиллик даромаднинг 25 фоизи 527,5 миллион еврога сотилди. Оддий қилиб тушунтирадиган бўлсак, «Барселона» кейинги 25 йил учун ҳар йили 21,1 миллион еврога тенг келадиган кредит олди.
21,1 миллион евро «Барселона» Ла Лигадан оладиган барча телеҳуқуқларининг атиги 25 фоизини ташкил этишини ҳисобга олсак, каталонияликлар ва Sixth Street ҳуқуқларнинг умумий тўпламини ҳар мавсум учун 84,4 миллион еврога баҳолаган.
Аслида ҳуқуқлар қанча туради? 2020/21 йилги мавсумда (ўтган мавсум учун маълумотлар ҳали мавжуд эмас) «Барселона» Ла Лига ТВ ҳуқуқларидан энг катта қисмини — 165 миллион евро олган. Яъни, клуб ҳозирда ярим миллиард еврога эга бўлиш учун келажак ҳуқуқларини ярим нархига сотиб юборди.
Sixth Street’га келадиган бўлсак, нарх даражаси ҳозиргидек қоладиган тақдирда ҳам компания икки баравар фойда олиши кафолатланган.
Ушбу келишув спорт менежменти солномаларидан ўрин олади ва барча мумкин бўлган бизнес курс ва форумларда муҳокама қилинади.
Бошқа томондан «Барселона» телеҳуқуқларини сотишдан кафолатланган даромадга эга бўлиши яхши. Аммо раҳбарият келажакдаги ворисларини ярим миллиард евродан маҳрум қилмоқда.
Алишер Никимбаев, футбол мутахассиси
Sixth Street «Сан-Антонио» баскетбол жамоасининг 20% улушига эгалик қилади, шунингдек, «Реал Мадрид»га 360 миллион доллар сармоя киритган. Мадрид клуби стадиондан тушган даромаднинг 30 фоизини компания ҳисобига ўтказади.
Изоҳ (0)