“Barselona” “Real” tarbiyalanuvchisini sotib olishi mumkin

“Barselona” “Tottenhem” himoyachisi Serxio Regilonga qiziqish bildirmoqda.

Kataloniya klubi rahbariyati chap qanot himoyasini ham kuchaytirish kerak deb hisoblaydi. Biroq birinchi navbatda himoya markazida to‘p suradigan Jyul Kunde (“Sevilya”) va o‘ng qanot himoyachisi Sezar Aspilikueta (“Chelsi”) bilan shartnoma imzolashni maqsad qilgan.

“Chelsi” sharafini himoya qiluvchi Markos Alonso ham “Barselona” sotib olishni ko‘zlayotgan futbolchilardan biri. Ammo 31 yoshli Alonso transferi bo‘yicha kelishuvga erishilmasa, chap qanotni kuchaytirish uchun alternativ variantlar mavjud.

Mundo Deportivo nashrining xabariga ko‘ra, Serxio Regilon ehtimoliy transfer ro‘yxatidan joy olgan.

Bir necha hafta oldin 25 yoshli futbolchining agenti Kia Jurabchian “ko‘k-anorranglilar” rahbariyatiga mijozi transferlar uchun ochiq ekanini bildirgan. Regilonning chap qanot himoyasi uchun eng yaxshi variantligiga asosiy sabablardan biri — uning transfer narxi arzonligidir.

19-iyul kuni Jurabchian Mayamida Mateu Alemani va Yordi Kroyff bilan uchrashgan. Kia “Barselona” darvozaboni Netoning ham agenti hisoblanadi. Tomonlar Xavi rejalariga kirmayotgan 33 yoshli posbonning ham kelajagini muhokama qilgan. Neto “Selta”ga o‘tish taklifini rad etgandi.

Regilon — “Real” tarbiyalanuvchisi hisoblanadi. U 2005-yilda klub tizimiga qabul qilingan. Bir nechta klublarda ijarada o‘ynaganidan so‘ng Serxio Madridni tark etib, 25 million evaziga “Tottenhem” tarkibiga o‘tgandi.

“Real” 40 million yevro evaziga himoyachini sotib olish huquqiga ega.