“Barselona” televizion huquqlarining yana bir qismini Sixth Street investitsiya kompaniyasiga o‘tkazmoqda. Bu haqida kataloniyaliklar rasmiy sayti ma’lum qildi.
“Ko‘k-anorranglilar” Sixth Street kompaniyasiga La Liga o‘yinlari telehuquqining 15 foizini 25 yilga bergan. Xabarga ko‘ra, ushbu kelishuv natijasida “Barselona” 320—330 dan 400 million yevrogacha daromad qiladi. Avvalroq kataloniyaliklar La Liga o‘yinlariga telehuquqining 10 foizini 207,5 million yevroga sotgandi.
Klubning moliyaviy ahvolini mustahkamlashga qaratilgan ikkinchi iqtisodiy dastakning faollashishi natijasida “Barselona” taxminan 550 million yevroni tashkil etadigan qarzdan qutuladi.
Biroq yangi futbolchilarni ro‘yxatdan o‘tkazish uchun klub uchinchi dastakni ham faollashtirishi lozim bo‘ladi. Bu “Barca Studios”ning (klub uchun ijodiy mahsulotlar yaratuvchi kompaniya) 49% huquqlarini sotish bo‘ladi.
Sixth Street “San-Antonio” basketbol jamoasining 20% ulushiga egalik qiladi, shuningdek, “Real Madrid”ga 360 million dollar sarmoya kiritgan. Madrid klubi stadiondan tushgan daromadning 30 foizini kompaniya hisobiga o‘tkazadi.
Izoh (0)