Xorazmda 225 ming dollarlik kredit mablag‘ini talon-toroj qilgan korxona rahbari ushlandi

Xorazm, Namangan va Toshkent viloyatlarida kredit mablag‘larini talon-toroj qilish holatlari aniqlandi. Bu haqda Iqtisodiy jinoyatlarga qarshi kurashish departamenti xabar qildi.

Qayd etilishicha, Bosh prokuratura huzuridagi departamentning Xiva tumani bo‘limi tomonidan tergovga qadar tekshiruv o‘tkazilgan. Unda “T.A.” MCHJ rahbari va boshqalar hududiy tijorat banki filialidan ajratilgan kredit mablag‘i evaziga sotib olingan 225,4 ming dollarlik issiqxona uskunalarini sotib yuborib, kredit mablag‘ini o‘zlashtirish yo‘li bilan talon-toroj qilgani aniqlangan.

Shuningdek, Namangan shahar bo‘limi tomonidan hududiy tijorat banki filialining murojaatiga asosan tergovga qadar tekshiruv o‘tkazilgan. Unda “Ch.A.” MCHJ rahbari A.B. va boshqalar o‘zaro til biriktirib, issiqxona qurilishi uchun ajratilgan 330 million so‘m kredit mablag‘ini issiqxona qurmasdan talon-toroj qilgani aniqlangan.

Toshkent tuman bo‘limi tomonidan o‘tkazilgan tergovga qadar tekshiruvda esa “A.F.” MCHJ rahbari N.A. va boshqalar o‘zaro til biriktirib, 5 nafar fuqaroning nomiga qora mol sotib olish uchun ajratilgan 155,3 million so‘m kredit mablag‘ini talon-toroj qilgani aniqlangan.

Holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.