Хоразм, Наманган ва Тошкент вилоятларида кредит маблағларини талон-торож қилиш ҳолатлари аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Хива тумани бўлими томонидан терговга қадар текширув ўтказилган. Унда «Т.А.» МЧЖ раҳбари ва бошқалар ҳудудий тижорат банки филиалидан ажратилган кредит маблағи эвазига сотиб олинган 225,4 минг долларлик иссиқхона ускуналарини сотиб юбориб, кредит маблағини ўзлаштириш йўли билан талон-торож қилгани аниқланган.
Шунингдек, Наманган шаҳар бўлими томонидан ҳудудий тижорат банки филиалининг мурожаатига асосан терговга қадар текширув ўтказилган. Унда «Ч.А.» МЧЖ раҳбари А.Б. ва бошқалар ўзаро тил бириктириб, иссиқхона қурилиши учун ажратилган 330 миллион сўм кредит маблағини иссиқхона қурмасдан талон-торож қилгани аниқланган.
Тошкент туман бўлими томонидан ўтказилган терговга қадар текширувда эса «А.Ф.» МЧЖ раҳбари Н.А. ва бошқалар ўзаро тил бириктириб, 5 нафар фуқаронинг номига қора мол сотиб олиш учун ажратилган 155,3 миллион сўм кредит маблағини талон-торож қилгани аниқланган.
Ҳолатлар юзасидан Жиноят кодексининг тегишли моддалари билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)