O‘zbekistonda ikki tomonlama hamkorlikni kengaytirish uchun Eronning innovatsiyalar uyi tashkil etiladi. Bu haqda Eronning fan va texnologiyalar bo‘yicha vitse-prezidenti Sourena Sattariga tayanib, Tehran Times xabar berdi.
Eron innovatsiyalar uyi xususiy sektor bilan hamkorlikda tashkil etiladi.
Ikki davlatning biotexnologiya sohasidagi yutuqlari, mushtarak qarashlari, o‘zaro manfaatli hamkorlikka intilishi alohida ahamiyatga ega, — dedi Eron vitse-prezidenti.
So‘nggi bir necha yil ichida Eron innovatsiyalar uylari Rossiya, Turkiya, Xitoy, Suriya, Keniya, Armaniston va Iroqda tashkil etilgan.
Biz biotexnologiyalar sohasidagi startap va ilmiy loyihalarni moliyalashtirish, olimlarimizning birgalikdagi ilmiy faoliyati uchun shart-sharoit yaratish, shuningdek, natijalarni tijoratlashtirish orqali innovatsion mahsulotlar ishlab chiqarishni kengaytirishga tayyormiz, — dedi u.
Vitse-prezidentga ko‘ra, bu sohaga kiritilayotgan investitsiyalar har ikki davlat manfaatlaridan kelib chiqqan holda innovatsion tadbirkorlikni yanada rivojlantirishga xizmat qiladi.
Innovatsion g‘oyalarni qo‘llab-quvvatlash, texnologik va innovatsion tadbirlarni o‘tkazish orqali markazlar Eronning bilimga asoslangan kompaniyalari, startaplari va ijodiy industriyalarini rivojlantirish va ilgari surish uchun platforma bo‘ladi.
Avvalroq O‘zbekiston va Eron o‘rtasida bio va nanotexnologiyalar, IT sohalarida qo‘shma loyihalar amalga oshirilishi haqida xabar berilgandi.
Izoh (0)