Ўзбекистонда икки томонлама ҳамкорликни кенгайтириш учун Эроннинг инновациялар уйи ташкил этилади. Бу ҳақда Эроннинг фан ва технологиялар бўйича вице-президенти Соурена Саттарига таяниб, Tehran Times хабар берди.
Эрон инновациялар уйи хусусий сектор билан ҳамкорликда ташкил этилади.
Икки давлатнинг биотехнология соҳасидаги ютуқлари, муштарак қарашлари, ўзаро манфаатли ҳамкорликка интилиши алоҳида аҳамиятга эга, — деди Эрон вице-президенти.
Сўнгги бир неча йил ичида Эрон инновациялар уйлари Россия, Туркия, Хитой, Сурия, Кения, Арманистон ва Ироқда ташкил этилган.
Биз биотехнологиялар соҳасидаги стартап ва илмий лойиҳаларни молиялаштириш, олимларимизнинг биргаликдаги илмий фаолияти учун шарт-шароит яратиш, шунингдек, натижаларни тижоратлаштириш орқали инновацион маҳсулотлар ишлаб чиқаришни кенгайтиришга тайёрмиз, — деди у.
Вице-президентга кўра, бу соҳага киритилаётган инвестициялар ҳар икки давлат манфаатларидан келиб чиққан ҳолда инновацион тадбиркорликни янада ривожлантиришга хизмат қилади.
Инновацион ғояларни қўллаб-қувватлаш, технологик ва инновацион тадбирларни ўтказиш орқали марказлар Эроннинг билимга асосланган компаниялари, стартаплари ва ижодий индустрияларини ривожлантириш ва илгари суриш учун платформа бўлади.
Аввалроқ Ўзбекистон ва Эрон ўртасида био ва нанотехнологиялар, IT соҳаларида қўшма лойиҳалар амалга оширилиши ҳақида хабар берилганди.
Изоҳ (0)