Joriy yilning yanvar—iyun oylarida bank kassalaridan (shu jumladan, bankomatlardan) berilgan naqd pullar 2021-yilning mos davriga nisbatan 40,8 foizga (47,5 trln so‘m) oshdi. Bu haqda Markaziy bank xabar berdi.
Bu bank kartalaridan naqd pul yechish hajmi 22,2 trln so‘mga (52,7 foiz) va banklar tomonidan naqd chet el valyutasini sotib olish 13,6 trln so‘m (43,7 foiz) oshishi hisobiga yuzaga keldi.
Shuningdek, joriy yilning birinchi yarimida bank kartalariga kirim qilingan mablag‘lar o‘tgan yilning shu davriga nisbatan 80,6 foizga (102,3 trln so‘mga) oshib, 229,2 trln so‘mni tashkil qildi.
Ushbu mablag‘larning 80,1 trln so‘mi — pensiya, nafaqa va ish haqi to‘lovlari, 67,9 trln so‘mi — xalqaro pul o‘tkazmalar va kartadan kartaga o‘tkazmalar, 47,1 trln so‘mi — naqd pulda va omonat hisobvaraqlardan bank kartalariga kirim qilingan mablag‘lar hissasiga to‘g‘ri kelgan.
Ushbu davrda bank kartalaridagi 64,3 trln so‘mlik (28,1 foiz) mablag‘lar aholi tomonidan naqdlashtirib olingan.
Shundan, bankomatlar orqali 50,4 trln so‘m va bank kassalari orqali 13,9 trln so‘m naqd pul yechilgan.
Banklarga tushgan naqd pullar va ularga bo‘lgan talab o‘rtasidagi farq Markaziy bank tomonidan muomalaga qo‘shimcha naqd pullarni chiqarish orqali ta’minlandi.
Bank tomonidan joriy yilning 6 oyi mobaynida muomalaga qo‘shimcha 11,8 trln so‘m naqd pullar chiqarildi. 1-iyul holatiga naqd pullarning umumiy pul massasidagi ulushi 25,6 foizni tashkil etdi.
Bundan tashqari, naqd pulga bo‘lgan talabni qondirish maqsadida, 15-iyuldan O‘zbekistonda 200 ming so‘mlik banknota muomalaga kiritildi.
Izoh (0)