Qirg‘iziston va Rossiya to‘liq savdo hisob-kitoblarini rublda amalga oshirishga o‘tdi. Bu haqda Qirg‘iziston iqtisodiyot va savdo vaziri Doniyor Amangeldiyevga tayanib, Interfaks xabar berdi.
Vazirning ta’kidlashicha, asosiy turdagi tovarlar uchun to‘lovlar Rossiya rublida amalga oshiriladi.
Hisob-kitoblar dollarda amalga oshirilgan yagona tovarlar guruhi — yoqilg‘i-moylash materiallari edi. Sanksiyalar qo‘llanilishi va SWIFT tizimining yopilishi munosabati bilan to‘lovlar bilan bog‘liq muammolar yuzaga keldi. Rubldagi hisob-kitoblarga o‘tishga qaror qilindi, — dedi Amangeldiyev.
Vazirning qo‘shimcha qilishicha, hozir Rossiya Qirg‘iziston bozoriga asosiy yoqilg‘i-moylash materiallari yetkazib beruvchi hisoblanadi.
Oxirgi paytlarda Rossiya rublining boshqa yetakchi jahon valyutalariga nisbatan kursi mustahkamlanib bormoqda.
Uning so‘zlariga ko‘ra, bu omil Qirg‘izistonda benzin va dizel yoqilg‘isi narxining oshishiga sabab bo‘lgan.
Shuningdek, Amangeldiyev rublning mustahkamlanishi va Rossiyaning rublda hisob-kitoblarga o‘tishi sababli yuzaga kelgan muammolar fonida kompaniyalarga qo‘shimcha yordam ko‘rsatilishini ma’lum qilgan.
Uning ta’kidlashicha, bozordagi vaziyatni barqarorlashtirish uchun Qirg‘iziston neft treyderlariga yoqilg‘i-moylash materiallari sotib olish uchun qo‘shimcha kredit ajratish rejalashtirilmoqda.
Avvalroq Rossiya va Qirg‘iziston havo hujumiga qarshi mudofaa bo‘yicha birlashgan mintaqaviy tizim yaratishi haqida xabar berilgandi.
Izoh (0)