Joriy yilning 1-iyul holatiga ko‘ra, O‘zbekistonda muomaladagi naqd pul miqdori 40,5 trln so‘mga teng bo‘ldi. Bu haqda “Daryo”ga Markaziy bank statistikasidan ma’lum bo‘ldi.
So‘nggi vaqtlarda bankomatlarda naqd pullar yetishmasligi ortidan Markaziy bank tomonidan muomalaga chiqarilayotgan naqd pullar hajmi oydan oyga ortib bormoqda.
Muomalaga chiqarilgan naqd pullar may oyida 3,7 trln so‘mga ko‘paygan bo‘lsa, iyun oyida bu ko‘rsatkich 3,6 trln so‘m bo‘ldi va natijada 1-iyun holatiga ko‘ra, qariyb 40,5 trln so‘mga yetdi.
Shu tariqa muomaladagi naqd pul miqdori 2013-yildan beri ketma-ket uchinchi oy rekord darajaga yetdi. Statistika aynan shu yildan boshlab keltirilgan.
May oyida, keng ma’nodagi pul massasi rekord darajada ko‘payib, (+13,3 trln so‘m) 158,5 trln so‘m bo‘lgan edi. Iyunda esa bu ko‘rstakich deyarli o‘zgarishsiz qoldi.
Shuningdek, milliy valyutadagi jami pul massasi 5,3 trln so‘mga oshib, 113,6 trln so‘mni tashkil etgan.
Chet el valyutasidagi depozitlar may oyida rekord darajada ko‘payib, 50 mlrd so‘mdan oshib ketgan edi. Iyun oyida esa 44,8 trln so‘mgacha kamaydi.
Markaziy bank tomonidan joriy yilning 6 oyi mobaynida muomalaga qo‘shimcha 11,8 trln so‘m naqd pullar chiqarildi. 1-iyul holatiga naqd pullarning umumiy pul massasidagi ulushi 25,6 foizni tashkil etdi.
Bundan tashqari, naqd pulga bo‘lgan talabni qondirish maqsadida, 15-iyuldan O‘zbekistonda 200 ming so‘mlik banknota muomalaga kiritildi.
Avvalroq Markaziy bank O‘zbekistonda dollar kursi bilan bog‘liq vaziyatni tushuntirgani haqida xabar berilgan edi.
Izoh (0)