«АҚШда қуроллар сони аҳоли сонидан кўп» — Камала Харрис

Оммавий отишмаларнинг тез-тез содир бўлиши АҚШни «доимий мотам тутадиган» мамлакатга айлантирди, ўқотар қуроллар туфайли нормал ҳаёт ривожи бузилди, деди АҚШ вице-президенти Камала Харрис NAACP (Американинг оқ танли бўлмаган аҳолиси ҳуқуқи ҳимоячилари уюшмаси) фуқаролик ҳуқуқлари ва ижтимоий адолат бўйича йиғилишида.

«Охирги 20 йил ичида бу мамлакатда ишлаб чиқарилган қуроллар сони уч баравар ошди. Бугун мамлакатимизда қурол-яроғ одамлардан кўра кўпроқ», — деди у.

«Фуқаролик ҳуқуқи ҳақида гап кетганда Қурол хавфсизлиги тўғрисида оқилона қонунлар зарурлиги масаласи чинакам муаммодир. Барча жамоалар эга бўлиши керак бўлган ҳуқуқ — бу кўчаларда уруш қуроллари бўлмаган хавфсиз жойда яшаш», — дея  хулоса қилди Харрис. 

У, шунингдек, АҚШ президенти Жо Байден томонидан қуролга эгалик қилиш қоидаларини кучайтирувчи федерал қонуннинг имзоланишини муҳим ва зарур қадам, деб атади.

Гап Байден июнь ойи охирида имзолаган қонун ҳақида бормоқда. Ушбу қонун лойиҳасини Вакиллар палатасининг 234 аъзоси қўллаб-қувватлаган, 193 аъзо эса қарши чиққан. Ҳужжат 21 ёшгача бўлган қурол сотиб олувчиларни текширишни кучайтириш, мактаб хавфсизлигини яхшилаш ва психиатр ёрдами учун катта маблағ ажратишни назарда тутади.

Қонун Техаснинг Ювалде шаҳридаги бошланғич мактабда июнь ойи охирида содир бўлган отишмадан кейин тайёрланган. 18 ёшли Салвадор Рамос талабалар ва ўқитувчиларга ҳужум қилди. У тўппонча ва ярим автоматик милтиқ билан қуролланган эди. Отишма пайтида 21 киши ҳалок бўлди — 19 бола ва икки нафар катта ёшли киши. Ҳужумчининг ўзи ҳам ҳибсга олиш пайтида вафот этди.

Байден тез-тез содир бўладиган бундай оммавий отишмалардан чарчаганини айтди ва Конгрессни қурол лоббисига қаршилик кўрсатишга чақирди. «Биз ҳаракатга ўтишимиз керак, менга бу қирғинга таъсир қила олмаймиз деб айтманг», — дея таъкидлади у. Байден сўнгги ўн йил ичида Қўшма Штатларда 900 дан ортиқ оммавий отишмалар содир бўлганини эслатди.