Butun Yevropa bo‘ylab tarqalayotgan jazirama to‘lqini sababli Buyuk Britaniyada favqulodda holat e’lon qilindi. Bu haqda Reuters xabar berdi.

Buyuk Britaniya sog‘liqni saqlash xavfsizligi agentligi (UKSHA) xavfning 4-darajasini e’lon qildi — bu “jazirama tufayli milliy favqulodda holat” deb ta’riflangan.

Rasmiylar aholi salomatligi bilan bog‘liq xavflar tufayli tibbiyot xodimlarini tayyorlab, tez yordam mashinalarini hozirlab qo‘ygan. Rekord darajadagi yuqori harorat harakatlanish, sog‘liqni saqlash muassasalari va maktablarning faoliyatini ham buzishi kutilmoqda. Bundan tashqari, mamlakatning ayrim hududlari elektr, suv va uyali aloqa xizmatlaridan uzilishi xavfi yuqori.

Buyuk Britaniya Meteorologiya byurosining ogohlanirishicha, yuqori harorat hatto sog‘lom odamlar orasida ham jiddiy kasallik va o‘limga sabab bo‘luvchi xavflarni keltirib chiqarishi mumkin.

London metro tarmog‘i qisqartirilgan jadval asosida ishlamoqda, yo‘lovchilar faqat o‘ta zarur hollarda undan foydalanishga chaqirildi. London yaqinidagi Luton aeroportida yuqori harorat tufayli uchish-qo‘nish yo‘lagi yuzasida nuqson paydo bo‘lgan, oqibatda reyslarning uchishi va qo‘nishi vaqtincha to‘xtatilgan.

Qayd etilishicha, Britaniya Harbiy-havo kuchlarining Brayz-Norton harbiy bazasi ham anomal issiqlik va uchish-qo‘nish yo‘lagi yuzasining yumshab qolishi bilan bog‘liq muammolar tufayli ishlamayapti.

Avvalroq Britaniyada mamlakat tarixidagi eng issiq kun kutilayotgani xabar qilingandi. Havo harorati birinchi marta 40 darajadan oshib ketishi prognoz qilinmoqda.